Qaraǵandylyq Darıǵa Qazanǵapova memleketten 122 teńge kóleminde ataýly kómek alǵan. Ákimdiktiń aıtýynsha, olar kópbalaly anaǵa aqshany durys bergen, eshqandaı qatelik bolmaǵan, dep habarlaıdy "Adyrna" ulttyq portaly orda.kz-ke silteme jasap.
31 arnanyń habarlaýynsha, Darıǵa Qazanǵapova tórt balanyń anasy retinde memleketten ataýly kómek alady. Jyl basynda oǵan 125 myń teńge kómek berilgen. Jazda Darıǵa jubaıymen úıde kartop egýdi qolǵa alǵan. Sheneýnikter ol otbasynyń tabysyna áser etedi dep, olarǵa járdemaqy berýden bas tartqan.
Darıǵa mundaı sheshimmen kelispeı, járdemaqy alýǵa qaıta ótinish bildirgen. Jeltoqsan aıynda oǵan 122 teńge áleýmettik kómek berilgen.
Kelinshek ony kórip, biraz tańyrqap qalǵan. Ol qatelik shyǵar dep, áleýmettik qorǵaý bólimine barǵan. Alaıda, onda oǵan eshqandaı qate ketpegenin aıtqan.
- Odan da bermeı-aq qoıǵany durys edi. 122 teńgemen bizdi mazaq qylǵansha, sizge otkaz keldi dep aıtsa bolatyn edi. Endi myna 122 teńgege bala-shaǵama ne nan, ne pampers ápere almaımyn. Úkimettiń naǵyz mazaǵy ma, ne endi bul? - dedi ashýly Darıǵa.
Ákimdiktegiler soma durys berilgenin áli de alǵa tartyp otyr. Olardyń aıtýynsha, otbasyna basqa da kómek berilgendikten, baza 120 teńge eseptep bergen.
- Áıeldiń joldasy eńbekpen qamtý baǵdarlamasymen jumysqa ornalasty. Sondyqtan onyń jalaqysy men balalarǵa beriletin jórgekaqysy bar. Sondaı-aq bul otbasy eki áleýmettik jolaqy kartasyn qoldanady. Osy sebepterge baılanysty 120 teńge ataýly áleýmettik kómek taǵaıyndaldy. Ár otbasynyń múshesine 20 teńgeden berildi, - dedi Qaraǵandy qalasy áleýmettik tólemder sektorynyń meńgerýshisi Larısa Harıtonova.
