اتىراۋدا iPad-تىڭ ماگنيتىن جۇتىپ، اۋرۋحانادا كوز جۇمعان ءبىر جاسار بالانىڭ ولىمىنە قاتىستى وبلىستىق بالالار اۋرۋحاناسىنىڭ دارىگەرلەرىنە سوت ۇكىمى شىقتى، دەپ حابارلايدى "ادىرنا" ۇلتتىق پورتالى "اق جايىق" باسىلىمىنا سىلتەمە جاساپ.
№2 سوتتىڭ ءباسپاسوز قىزمەتىنىڭ مالىمەتىنە سۇيەنسەك، اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 317-بابىنىڭ 3-بولىگىمەن (مەديتسينا قىزمەتكەرىنىڭ كاسىبي مىندەتتەرىن تيىسىنشە ورىنداماۋى، ادام ولىمىنە اكەپ سوقتىرۋى) قىلمىستىق ءىس قوزعالدى. سوتتا انىقتالعانداي، سول كۇنى كەزەكشىلىكتە بولعان حيرۋرگتەر تىلەۋعاليەۆ، زۋلقاشەۆ، ادريسوۆ، پەدياتر تاجعاليەۆا بالاعا ءتيىستى مەديتسينالىق كومەك كورسەتپەگەندىكتەن، ول قايتىس بولدى.
سوتتالۋشىلاردىڭ كىناسى نارەستەنىڭ تۋىستارى مەن كۋاگەرلەردىڭ ايعاقتارىمەن، ساراپتاما قورىتىندىسىمەن راستالدى. اتاپ ايتقاندا، بالانىڭ اجەسى دەنساۋلىق ساقتاۋ مينيسترلىگىنە جازعان وتىنىشىندە دارىگەرلەردىڭ بوتەن زاتتىڭ دەنەدەن تابيعي جولمەن كەتەتىنىن ايتىپ، وتا جاساۋدان باس تارتقانىن ايتقان.
ءتورت ايىپتالۋشىعا دا 2 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. نەگىزگى جازاعا قوسىمشا جازا تاعايىندالدى: زۇلقاشەۆقا 3 جىل، قالعانىنا 2 جىل مەديتسينالىق قىزمەتپەن اينالىسۋعا تىيىم سالىندى. سونىمەن بىرگە ولاردىڭ بارلىعى قازاقستان تاۋەلسىزدىگىنىڭ 30 جىلدىعىنا وراي جاريالانعان راقىمشىلىققا سايكەس، "باس بوستاندىعىنان ايىرۋ تۇرىندەگى جازادان بوساتىلدى، ويتكەنى ولاردىڭ ءىس-ارەكەتتەرى اۋىر ەمەس قىلمىسقا جاتادى".
ەسكە سالايىق، 2019 جىلدىڭ جەلتوقسانىندا 11 ايلىق نارەستە باتارەيا جۇتىپ، قايتىس بولعان.
«ادىرنا» ۇلتتىق پورتالى.
