Şymkent qalasynda “Samgau” respublikalyq qysqametrajdy filmder festivalı öttı. Şara Şymkent qalasy äkımdıgınıŋ qoldauymen ūiymdastyryldy. Maqsaty – ūlttyq kinoöndırıstıŋ damuyna serpın beru, şyǧarmaşyl jastardy qoldau jäne jaŋa esımderdı kino keŋıstıgıne tanytu.
Festivalge Qazaqstannyŋ tükpır-tükpırınen 18 ben 35 jas aralyǧyndaǧy jas rejisserler men prodiuserler qatysyp, türlı janr men taqyryptaǧy tuyndylaryn ūsyndy. Ūiymdastyruşylarǧa 30-dan astam qysqametrajdy film kelıp tüsıp, olardyŋ ışınen ırıktelgen 20 üzdık tuyndy aqtyq kezeŋge öttı.
Filmder kelesı taqyryptar boiynşa qabyldandy: «Şymkent – süiıktı qalam!», «Men jäne Älem», «Ūlttyq qūndylyq – tärbie negızı», «Jūmysşy mamandyqtardyŋ rölı», «Ekologiia», «Tılımızdıŋ taǧdyry – bızdıŋ qolymyzda». Būl taqyryptar bügıngı qoǧamdaǧy özektı mäselelerdı köterıp, jastardyŋ közqarasyn, oi-tolǧauyn beineleuge jol aşty.
Festival aiasynda ötken saltanatty aşylu räsımı Şymkent qalasyndaǧy Jastar resurstyq ortalyǧynda öttı.
“Samgau” festivalı – būl jai ǧana baiqau emes, sonymen qatar jas kinogerler üşın täjıribe almasyp, şyǧarmaşylyq bailanys ornatatyn alaŋ. Jastardyŋ kino tılı arqyly öz oiyn jetkızuı – qazaq kinosynyŋ jaŋa buyny qalyptasyp kele jatqanyn körsetedı. Festival körermenderge tyŋ taqyryptar men jaŋa esımderdı tanystyryp, ūlttyq kinoöndırıstıŋ bolaşaǧyna senım ūialatty.
