Soŋǧy uaqytta qazaqstandyq käsıpkerlerdıŋ bır bölıgı Qyrǧyzstanda zaŋdy tūlǧalar men jeke käsıpkerlıktı tırkei bastaǧany baiqalady. Biznes ökılderı būl ürdıstı körşı eldegı salyq salu şarttarynyŋ anaǧūrlym tiımdı boluymen bailanystyryp otyr, dep habarlaidy "Adyrna" ūlttyq portaly Kursiv.kz saityna sıltep.
Salyq sarapşysy Maksim Baryşev juyrda bergen sūhbatynda Qazaqstannan biznestıŋ Qyrǧyzstan men Özbekstanǧa köşu qaupıne nazar audardy. Onyŋ aituynşa, būǧan atalǧan elderdegı liberaldy salyq zaŋnamasy yqpal etıp otyr.
Sarapşynyŋ deregınşe, Qyrǧyzstanda jeke käsıpkerler üşın ainalym salyǧy 1% ǧana bolsa, qosylǧan qūn salyǧy 12% deŋgeiınde saqtalǧan. Sonymen qatar qazaqstandyq kompaniialar Qyrǧyzstandaǧy käsıpkerler körsetken qyzmetterdı salyqtyq şegerımge engıze alady. Al Qazaqstanda «jeŋıldetılgen salyq rejimımen» jūmys ısteitın biznes subektılerımen özara esep aiyrysuǧa qatysty talaptar qataŋdatylǧan.
«Qyrǧyzstan men Özbekstan ökılderımen ötken jabyq kezdesude olar Qazaqstanda engızılıp jatqan Salyq kodeksın “öte tiımdı” dep baǧalady. Olardyŋ aituynşa, soŋǧy ailarda täuelsızdık alǧannan berı bolmaǧan deŋgeide şeteldık investorlar aǧyny baiqalyp otyr», - dedı Maksim Baryşev.
Būl mäselege Mäjılıs deputaty Aituar Qoşmambetov te nazar audardy. Ol äleumettık jelılerde Qyrǧyzstanda TMD elderı azamattaryna jeke käsıpker tırkeudı ūsynatyn jarnamalar jiı kezdese bastaǧanyn jazdy. Deputattyŋ pıkırınşe, mūndai ürdıs Qazaqstannan biznestıŋ ketuı esebınen körşı elde jaŋa kompaniialardyŋ köbeiuıne alyp keluı mümkın.
Sonymen qatar Threads äleumettık jelısınde bırneşe qazaqstandyq käsıpker Qyrǧyzstanda zaŋdy tūlǧa aşu täjıribesımen bölıstı. Keibırı būl qadamdy salyqtyq jüktemenıŋ tömendıgımen jäne äkımşılık räsımderdıŋ jeŋıldıgımen tüsındırgen.
Alaida qoǧamdaǧy pıkırler bırjaqty emes. Bırqatar qoldanuşylar biznestı Qyrǧyzstanǧa köşıru joldaryn sūrasa, endı bıreulerı mūndai täjıribenı synǧa aldy. Syn aituşylardyŋ pıkırınşe, Qazaqstannan ketıp jatqan biznestıŋ bır bölıgı kargo-importpen ainalysyp, tauarlardy qaita satu arqyly tabys tapqan käsıpkerler boluy mümkın.
Osylaişa, salyq saiasaty men retteu talaptaryndaǧy aiyrmaşylyqtar öŋır elderı arasyndaǧy biznes aǧyndaryna yqpal etıp otyr. Sarapşylardyŋ pıkırınşe, būl ürdıs aldaǧy uaqytta Qazaqstannyŋ salyq jäne investisiialyq saiasatyna qaita qarau qajettılıgın kün tärtıbıne şyǧaruy mümkın.
