Mädeniet jäne aqparat ministrlıgı «Qala hikaialary» atty jaŋa respublikalyq ädebi baiqaudy jariialady. Proza janryna arnalǧan baiqau qazırgı Qazaqstan qalalarynyŋ tynys-tırşılıgın körkem şyǧarmalar arqyly beineleitın jaŋa esımderdı anyqtauǧa jäne qoldauǧa baǧyttalady. Baiqauǧa qatysuşylarǧa qala mädenietı, adam taǧdyry, qoǧamdaǧy özgerıster, sondai-aq ūlttyq bolmys pen zamanaui qūndylyqtardyŋ sabaqtastyǧy taqyryptaryn körkem tuyndylar arqyly jetkızu ūsynylady.
Ädebi baiqauǧa Qazaqstan Respublikasynyŋ azamattary qatysa alady. Qatysu üşın kölemı kemınde 10 avtorlyq baspa tabaq (bır avtorlyq baspa tabaqtyŋ kölemı 40 myŋ baspa taŋbasyn qūraidy) bolatyn, būryn eş jerde jariialanbaǧan qala taqyrybyndaǧy romandar qabyldanady. Är avtor bır ǧana şyǧarmasyn ūsyna alady.
Jeŋımpazdardy belgılı jazuşylar men qoǧam qairatkerlerınen qūralǧan qazylar alqasy anyqtaidy. Qorytyndy şeşım aşyq dauys beru arqyly qabyldanady.
Baiqau qorytyndysy boiynşa üzdık şyǧarmalardyŋ avtorlary diplomdarmen jäne aqşalai syilyqtarmen marapattalady. Sonymen qatar jüldelı oryn alǧan tuyndylar 15 myŋ danamen basylyp, elımızdıŋ kıtaphanalaryna taratylady.
Respublikalyq baiqau erejesıne säikes, jeŋımpazdarǧa mynadai syiaqylar belgılengen:
Bas jülde – 100 myŋ AQŞ dollary;
I oryn – 75 myŋ AQŞ dollary;
II oryn – 50 myŋ AQŞ dollary;
III oryn – 30 myŋ AQŞ dollary.
Baiqau jūmystary 2026 jylǧy qyrküiek pen jeltoqsan ailary aralyǧynda qabyldanady. Qūjat Astana qalasy, Mäŋgılık El daŋǧyly, 8, 14-kıreberıs, Qazaqstan Respublikasy Mädeniet jäne aqparat ministrlıgınıŋ mekenjaiy boiynşa ötkızıluı qajet.
Baiqauǧa qatysu şarttary turaly qosymşa aqparatty +7 (7172) 74 04 07 jäne +7 (7172) 74 04 08 telefon nömırlerı arqyly aluǧa bolady.
