Mäjılıstıŋ būrynǧy deputaty Baqytjan Bazarbek Jambyl oblysynda bolǧan jol-kölık oqiǧasyna bailanysty pıkır bıldırdı. Ol äleumettık jelılerde taraǧan türlı aqparat pen boljamdarǧa äzırge tüsınıkteme bere almaitynyn aityp, oqiǧa boiynşa tergeu jürıp jatqanyn jetkızdı, dep habarlaidy "Adyrna".
Būrynǧy deputattyŋ aituynşa, özı men jūbaiy tergeu qūpiiasyn saqtauǧa qatysty qolhat bergen. Qazır qylmystyq ıs aiasynda qajettı saraptamalar jürgızılıp jatyr.
Bazarbek äleumettık jelılerde oqiǧaǧa qatysty türlı nūsqalar men rastalmaǧan aqparattardyŋ taraǧanyn atap öttı. Onyŋ sözınşe, tergeu aiaqtalmaiynşa oqiǧanyŋ män-jaiyna qatysty naqty pıkır aituǧa mümkındıgı joq.
Ol qūqyq qorǧau organdary jol apatynyŋ barlyq män-jaiyna zaŋ aiasynda obektivtı baǧa beretınıne senım bıldırdı.
«Barşaŋyzdy asyǧys qorytyndy jasamauǧa jäne tek resmi aqparat pen tergeu nätijelerıne senuge şaqyramyn», – dep jazdy Baqytjan Bazarbek.
Eks-deputat qazırgı taŋda basty nazar zardap şekken azamattyŋ densaulyǧyna audarylyp otyrǧanyn aitty. Onyŋ mälımdeuınşe, özı jäne jaqyndary jaraqat alǧan azamattyŋ tezırek sauyǧyp ketuın tılep otyr.
Sondai-aq ol zardap şekken adamǧa alǧaşqy medisinalyq kömek körsetken audandyq auruhana därıgerlerıne, Densaulyq saqtau ministrlıgıne jäne oblystyq densaulyq saqtau basqarmasyna alǧysyn bıldırdı.
Būǧan deiın bırqatar aqparat qūraldarynda Jambyl oblysyndaǧy jol apatyna Baqytjan Bazarbektıŋ qatysy bary turaly aqparat taraǧan. Alaida polisiia kölıktı naqty kım basqarǧanyn äzırge resmi türde jariialaǧan joq.
Oblystyq polisiia departamentınıŋ mälımetınşe, aldyn ala aqparat boiynşa, Toyota avtokölıgınıŋ jürgızuşısı, B. esımdı azamat joldyŋ jürıs bölıgınde tūrǧan er adamdy qaǧyp ketken. Jol-kölık oqiǧasy saldarynan er adam auruhananyŋ jansaqtau bölımıne jetkızılgen.
Oqiǧaǧa qatysty qylmystyq ıs qozǧalyp, tergeu amaldary jalǧasyp jatyr.
