Taşkentke kölık satyp aluǧa barǧan Qazaqstan azamaty metroda joǧaltyp alǧan 10 myŋ dollaryn tolyq kölemde qaitaryp aldy, dep habarlaidy "Adyrna" ūlttyq portaly.
Taşkent metropolitenı baspasöz qyzmetınıŋ mälımetınşe, jolauşylardyŋ bırı stansiialardyŋ bırınen şetel valiutasy salynǧan pakettı tauyp, ony metronyŋ qauıpsızdık qyzmetkerlerıne tapsyrǧan.
Özbekstan IIM habarlauynşa, aqşanyŋ iesın anyqtau üşın Face ID jüiesı qoldanylǧan. Nätijesınde 10 myŋ dollar zaŋdy iesıne qaitaryldy.
Aqşanyŋ iesı qarajat joǧalǧanyn avtonaryqqa barǧan kezde ǧana baiqaǧan. Onyŋ aituynşa, ol «Almazar» stansiiasynan «Sırgelı» baǧytyna qarai kele jatqanda sömkesınen aqşa tüsıp qalǧanyn baiqamai qalǧan.
Qazaqstan azamaty aqşasyn tauyp, qaitaruǧa kömektesken metro qyzmetkerlerı men Özbekstannyŋ ışkı ıster organdaryna alǧys bıldırdı.
