Qoiny toly qūpiia, ǧasyrlardyŋ qūrdasy,
Älem jaratylǧaly, Äz nauryz jyl basy,
Taǧy da bır jaŋa jyl, keldı baitaq jerıme,
«Qoian» ketıp barady aǧaraŋdap qyrdy asyp.
Assalaumaǧalikum, qadırlı qauym, Türkı düniesınıŋ eŋ ūly merekesı – Äz-nauryz barşa Türkı balasyna baqyt pen bailyq äkelsın! Är künımız quanyşqa tolsyn! Elımız aman, jerımız tynyş, qarttarymyz alaŋsyz, jastarymyz baqytty bolyp abroiymyz arta bersın!
Janǧa toly qalamyz, dänge toly dalamyz, qazynaly qartymyz, qasiettı balamyz bolsyn!
NAURYZ KÜNI QAZAQTYŊ BÄRI QYDYR
Kırpıgınen aspannyŋ nūr tögılıp,
Yntyǧady sol nūrǧa jūrt emınıp.
Tırşılıktıŋ keruenı jyljidy alǧa,
Bır ılgerlep, bır toqtap, bır şegınıp.
Uaqyttyŋ teŋızın keşıp ötken,
Keldı, mıne, äz-Nauryz - toty-köktem.
Kırpık qaqpai küzetıp būl ǧalamdy,
Qyrsyqtardy boldyrmai şyrǧalaŋdy.
Samal bolyp sybyrlap bata berıp,
Qydyr ata aralap jür dalamdy.
Oşaq asqan bırge jür anamen de,
Bırge jür ol oinaǧan balamen de...
Aru - köktem, būl köktem – Ana - köktem,
Tas balqidy demınen janap ötken.
Köktemge erıp ūmytyp qaiǧy-mūŋdy,
Ketkım kelıp tūrǧany-ai, bala bop men.
Erkeleter, jūrt menı erkeleter,
Köktem sūlu ūnatar, erte keter...
Asyra aityp qoidyŋ dep sökpe menı,
Bolsa bolar oiymnyŋ jetpegenı.
Nauryz künı qazaqtyŋ bärı Qydyr,
Alǧys bolyp daridy aq degenı.
Qydyr dep bıl jasty da, kärını de,
Perıştedei kırşıksız bärı, mıne.
İmanǧazy Nūrahmetūly
