14 nauryz Amal merekesı künı balalar üiıne, köpbalaly jäne erekşe balasy bar otbasylarǧa ūlttyq däm men taǧamdarǧa toly «Tartu», eŋbek adamdary men ziialylarǧa «Sybaǧa» atty Nauryz qorjyny tartu etıldı.
«ŪLY DALA DÄMI» ūlttyq jobasy Nauryz merekesıne jaŋa mazmūn berıp, ūlttyq qūndylyqtardy jaŋǧyrtuǧa baǧyttalǧan. Ūlystyŋ ūly künın jaŋaşa atap ötuge qatysty Memleket basşysy Qasym-Jomart Toqaev ta ünemı aityp keledı.
Joba bastamaşysy – «Alatau Aqparat» mediaholdingı. Onyŋ Bas direktory Erjan Qalymbaiūly: «Negızgı maqsatymyz – Äz-Nauryzdy äsırese, balalar asyǧa kütetın basty merekege ainaldyru. Ūlystyŋ ūly künın airyqşa atap ötude jaŋa qūndylyqtar men dästür qalyptastyruǧa öz ülesımızdı qosqymyz keledı», – deidı.
Almaty oblystyq №1 balalar üiıne ūlttyq kiımdegı qolynda asa taiaǧy bar Qydyr ata nemeresımen bırge atpen bardy. Ol balalarǧa Nauryz batasyn berıp, «Tartu» qorjyndaryn ülestırdı. Balalar da öz önerlerın körsettı. Ūiymdastyruşylar Qydyr Atanyŋ nemeresın – Baq-bala (Baq qarasyn, Qydyr darysyn) dep ataudy jön körgen.
Etnograf Bolat Bopaiūlynyŋ sözınşe, Nauryzdy jaŋaşa därıpteude balalarǧa erekşe köŋıl bölınuı kerek. Qydyr atanyŋ nemeresımen jüruı ūrpaqtar sabaqtastyǧy men ūlttyq tärbienıŋ mänın körsetedı. Qazaq ūǧymynda atasy ūl nemerelerın, al äjeler qyz nemerelerın tärbielegen. Sondyqtan Qydyr Ata men Baq-balany Nauryzdyŋ balalar asyǧa kütetın basty keiıpkerlerıne ainaldyru kerek.
Ūlttyq naqyşta bezendırılıp kiız üi pışınınde tıgılgen balalarǧa arnalǧan «Tartu» qorjyndarynyŋ ışıne Qazaqstannyŋ är öŋırınen jetkızılgen (batys, şyǧys, oŋtüstık, soltüstık) dämder salynǧan. Olardyŋ sany jeteu (kielı san): şūbat, qymyz, qūrt, ırımşık, jent, bauyrsaq, talqan, sondai-aq ruhani azyq – kıtap pen Almatynyŋ almasy, Altaidyŋ baly, ūlttyq kädesyilar men oiynşyqtar bar. Kıtaptardyŋ syilyq qūramynda boluy – jastardy bılım-ǧylymǧa şaqyrady.
Qorjyndardaǧy tabiǧi ärı türlı därumenderge bai ūlttyq taǧamdar balalardy salauatty tamaqtanuǧa bastaidy. Sondai-aq, joba ūlttyq taǧam türlerı men qolöner būiymdaryn nasihattap, sala käsıpkerlerın qoldauǧa jaqsy mümkındık.
Nauryzda jastar ülkenderge arnaiy baryp sälem berıp, qūrmet körsetıp batasyn alǧan. Ūlttyq jobany ūiymdastyruşylar da Asanälı Äşımov, Asyly Osman, Töregeldı Şarmanov pen Qarlyǧaş Äbdıkärımova syndy el aǧalaryna, qoǧam qairatkerlerıne sondai-aq qarapaiym eŋbek adamdaryna da sälem bere bardy. Olarǧa Nauryz qorjyny tartu etılıp, qūrmet körsetılıp, iyqtaryna şapan jabyldy.
Ülkenderge berılgen «Sybaǧa» qorjynyna jetı dämnıŋ syrtynda jyly-jūmsaq: sürlengen qazy-qarta, jal-jaia men jambas salynǧan.
Nauryz qorjyn berılgender arasynda qarapaiym köşe sypyruşy, «Altyn alqa» iegerı men erekşe balany jalǧyz tärbielep otyrǧan ana da bar.
Alǧaş ret ūiymdastyrylǧan ūlttyq jobanyŋ basty demeuşılerı: «Asiakoz» türık köz klinikasy, «Erke-Nūr», «Ädemı-Ai» men «Adal As» syndy tanymal kompaniialar. Sondai-aq, elımızdıŋ barlyq öŋırınen «Zhent_chocolate», «Aqtobe damderi», «Sharman», «Asatu», «Astana-Önım» AQ, «Miod Vostochnyi», «Aiqan» JŞS syndy ūlttyq taǧamdar, kiımder men būiymdar şyǧaratyn kompaniialar, sauda markalary jäne «Steppe&World Publishing» baspa üiı atsalysyp, demeuşılık tanytty. Qazaq taǧamtanu akademiiasy, Qazaq memlekettık Sirkı men ūlttyq taǧamtanuşy Saiahat Äsımhan da jobaǧa öz ülesterın qosty.
Ūiymdastyruşylar «Ūly dala dämı» ūlttyq jobasyn aldaǧy jyldary 14 nauryzdan bastap aidyŋ soŋyna deiın tūtas respublika kölemınde ötkızudı josparlap otyr.
