Ardager jurnalist Samat İbraim ömırden öttı. Būl turaly jurnalist Baǧdagül Balaubaeva Facebook paraqşasynda aitty, dep habarlaidy “Adyrna” ūlttyq portaly.
“Men üşın orny bölek azamat. Bolmysy bölek tūlǧa. Qarapaiymdylyǧy men eŋbekqorlyǧy özgelerge ülgı basşy. Menıŋ jurnalistikaǧa keluıme sebepşı redaktor... Endı mıne, jaqsylyq şarapatyn tigızgen Samat aǧa da, Nūrperzent aǧa da kelmestıŋ kemesıne mınıp, estelık jazyp otyrmyn. Qoş bolyŋyz, jaqsy aǧa”, dep jazdy Baǧdagül Balaubaeva.
Qazaqstan Jazuşylar odaǧynyŋ jäne Qazaqstan Jurnalister odaǧynyŋ müşesı, Qazaqstan Jurnalistikasy Akademiiasynyŋ akademigı Samat İbraimmen qoştasu räsımı 6 qaraşa künı Qazaqstan Jazuşylar odaǧynda ötedı.
Samat Bektenūly İbraim 1955 jyly 18 mausym, Atyrau oblysy, İsatai audany, Aibas auylynda tuǧan. Jurnalist, zaŋger. QazMU-dıŋ jurnalistika fakultetın (1982 j), D.A.Qonaev atyndaǧy Gumanitarlyq universitetınıŋ zaŋ fakultetın (1999) bıtırgen. Eŋbek jolyn 1972 jyly «Jaiyqmūnaigaz» basqarmasynda operator boludan bastaǧan. 1974-1976 jyldary äskerde qyzmet etken. Atyrau oblystyq «Kommunistık eŋbek» gazetınde tılşı (1982-86), respublikalyq «Leninşıl jas» gazetınıŋ Kaspii aimaǧyndaǧy menşıktı tılşısı (1986-90), Qazaqstan Respublikasy Parlamentınıŋ organy bolǧan «Halyq keŋesı» gazetınde bölım meŋgeruşısı, jauapty hatşy, bas redaktordyŋ orynbasary bolyp ıstedı (1990-1996). Qazaqstan Respublikasy Bas prokuraturasynyŋ bölım bastyǧy, «Zaŋ jäne zaman» – «Zakon i vremia» jurnalynyŋ bas redaktory boldy (1996-2003). «Zaŋnama» JŞS-nıŋ direktory, respublikalyq «Aqiqat» jurnalynyŋ bas redaktory (2003-2009) boldy. 2009 jyldyŋ nauryz aiynan «Ana tılı» gazetınıŋ bas redaktory.
«Atyrau aqyn-jazuşylarynyŋ kıtaphanasy» seriiasy boiynşa «Ǧūmyrlyq saǧynyş» äŋgımeler jinaǧy (2003), «Mūnaişy» qoǧamdyq qory şyǧaratyn «Qazaq mūnaiynyŋ ardaqtylary» seriiasymen «Salamat Mūqaşev» (2006), «Asqar Qūlybaev» (2007), «Jetpısbai Esenjanov» (2008) atty derektı ǧūmyrnamalyq esse kıtaptary baspadan jaryq kördı. Qazaqstan prokuraturasy tarihy turaly «Däuır dauysy» kıtabynyŋ (1997) qūrastyruşysy ärı redaktory. Qazaqstan Respublikasy Mädeniet jäne aqparat ministrlıgınıŋ baǧdarlamasy boiynşa «N.Nazarbaev – etnosaralyq jäne dınaralyq qazaqstandyq kelısımnıŋ negızın qalauşy» atty kıtapty (2005 j.), «Kaspii qairaŋy» tanymdyq basylymyn (2000 j.), «Mädeni mūra» memlekettık baǧdarlamasynyŋ kıtap seriialary boiynşa «Qazaqstannyŋ qazırgı zamanǧy mädeniettanu paradigmalary» dep atalatyn 10-şy tomdy (2006), «Älemdık filosofiialyq mūra. HH ǧasyrdaǧy mädeniet filosofiiasy» 17-şı tomdy (2008) jäne t.b eŋbekterdı, tarih, zaŋ, ekonomika salasyndaǧy ädebietter men oqu qūraldaryn memlekettık tılge audardy.
