22 nauryzda Aqtau qalasynda tarihi sät oryn aldy. Qazaqtyŋ ūlttyq kiımın kigen 5500 adam bır mezette jinalyp, «Qazaq ūlttyq kiımmen eŋ köp adam jinalysy» nominasiiasy boiynşa Ginnes rekordyn ornatty.
Şaraǧa arnaiy barǧan jurnalist Alma Sailauqyzy Facebook paraqşasynda jazba jariialady.
Ol qatysuşylardan sūhbat alyp, äserımen bölısken.
Jinalǧandardyŋ aituynşa, ıs-şarany ötkızude jaŋbyr jauyp, qiyndyqtar bolǧan. Alaida jaŋbyr halyqtyŋ köterıŋkı köŋıl küiıne äser etpegen.
Şaraǧa qatysqan Aqtau tūrǧyny özınıŋ äserın jetkızdı.
“Qazaqtyŋ ūlttyq kiımı endı Ginnes rekordtar kıtabynda bar! Patriottyq sezım öte joǧary, şynymdy aitsam. Jaŋbyr eşqandai josparymyzdy būzǧan joq. Köŋıl küiımız de tamaşa. Bärımız bır qolşatyrdyŋ astynda jylynyp, än aityp, bi biledık. Men 3997-şı bolyp tırkelgenmın”, - dedı.
Jinalǧandardyŋ qatarynda qazaq halqynyŋ mädenietıne qyzyǧuşylyq tanytqan özge ūlt ökılderı de boldy. Solardyŋ bırı – qazaqy naqyşta kiıngen Tatiana esımdı tūrǧyn.
“Bügıngı köŋıl küi tamaşa! Qanşama ädemı äielder men er adamdar jür. Şynymen osy rekordtyŋ bolǧanyn qaladym. Qazaqstannyŋ Ginnes rekordtar kıtabynda boluyn qaladym. Menıŋ bıluımşe, Maŋǧystauda ärbır otbasynda, är äiel men qyz balasynda ūlttyq kiım bar. Maǧan solai aitty. Nauryz qūtty bolsyn!” – dep äserımen bölıstı.
Is-şaraǧa qatysqan apaly-sıŋlı Izımhan men Nysankül būl rekordtyŋ bolaşaq ūrpaq üşın maŋyzy zor ekenın aitty.
“Äserımız öte keremet. Barlyǧy küştı öttı. Ruhymyz köterıldı. Özıŋnıŋ şyqqan jerıŋdı, tegıŋdı, qazaq ekenıŋdı älemge atyŋ qalatyndai ıske nege aralaspasqa?” - deidı olar.
Ūlttyq mädeniettı älemge tanytudaǧy būl bastama aldaǧy uaqytta da jalǧasady dep kütılude.
Ūqsas jaŋalyqtar
