Batys Qazaqstan oblysy Qaztalov audanynyŋ aumaǧyna ūşqyşsyz ūşatyn apparattyŋ bölşekterı qūlaǧany turaly aqparat tarady. Oqiǧa 27 nauryz künı keşkı uaqytta Kökterek auyldyq okrugı maŋynda bolǧan, dep habarlaidy “Adyrna” ūlttyq portaly.
BQO polisiia departamentınıŋ baspasöz qyzmetınıŋ habarlauynşa, apparattyŋ bölşekterı Saraljyn (Kirov) auylynan şamamen 10 şaqyrym qaşyqtyqta tabylǧan. Qazırgı uaqytta uäkılettı organdar oqiǧanyŋ män-jaiyn anyqtau maqsatynda tekseru jūmystaryn jürgızıp jatyr.
“Nysan eldı mekennen alys aumaqta tabyldy. Qazırgı kezde tiıstı qyzmettermen bırlesıp tekseru ıs-şaralary jalǧasuda”, – dep mälımdedı vedomstvo ökılderı.
Aita keteiık, būl Batys Qazaqstan oblysynda tırkelıp otyrǧan alǧaşqy jaǧdai emes. Būǧan deiın osyndai oqiǧalar Bökei ordasy audany Ūialy, Tasqala audany Atameken, Jänıbek audany Ūzynköl jäne Qamysty auyldary maŋynda da bolǧan.
Qūzyrly organdar oqiǧanyŋ sebepterın anyqtap, qosymşa aqparat beruge uäde ettı.
Ūqsas jaŋalyqtar
