Tarazda «Qyzǧaldaq mūra» halyqaralyq festivalı aiasynda ötken ǧylymi-täjıribelık konferensiiada Germaniia, Ukraina, Qyrǧyzstan jäne Niderlandy sarapşylary söz söiledı.
HBM (Niderlandy) kompaniiasynyŋ menedjerı Pichna Marseli qyzǧaldaqty Jambyl oblysynyŋ turistık brendı dep sanauǧa bolady dep esepteidı.
– Atalǧan konferensiiany ötkızu Qazaqstannyŋ, atap aitqanda Jambyl öŋırınıŋ turizm salasynda ülken äleuetke ie ekendıgın körsetedı, – dep atap öttı ol. – Köptegen adamdar qyzǧaldaqtyŋ qaidan şyqqanyn jäne osy teŋdessız güldıŋ tarihyn bıle bermeidı. Türlı nūsqalar bar, bıraq onyŋ şyǧu tarihynda Jambyl jerı basty röl atqaratyny sözsız. Mūny tabiǧi jaǧdailar da, ǧylymi zertteuler de rastaidy. Eŋ bastysy, būl tabiǧi bailyqty saqtap, mädeni-turistık jobalarǧa sauatty türde engızu – öte maŋyzdy.
Kassel universitetınıŋ (Germaniia) professory Erih Helmut Fraitag konferensiianyŋ nätijelı halyqaralyq dialog pen ozyq täjıribe almasu alaŋyna ainalǧanyn atap öttı.
V. Karazin atyndaǧy Harkov memlekettık universitetı (Ukraina) botanikalyq baq direktorynyŋ orynbasary Aleksandr Alehin oqu ordasynyŋ bazasynda Jambyl oblysynyŋ qyzǧaldaqtaryn zertteu nätijelerımen bölıstı.
J. Balasaǧūn atyndaǧy Qyrǧyz ūlttyq universitetınıŋ kafedra meŋgeruşısı, geografiia ǧylymdarynyŋ kandidaty Almagül Kendırbaeva jabaiy qyzǧaldaqtardy qorǧau boiynşa täjıribelık ūsynystaryn ortaǧa saldy. Ol tabiǧi populiasiialardyŋ osaldyǧyna jäne olardy qorǧauǧa halyqaralyq közqarastyŋ qajettılıgıne nazar audardy.
– Jambyl oblysyn qyzǧaldaqtardyŋ otany deuge tolyq negız bar. Sarapşylar men tabiǧat janaşyrlary üşın 21 ǧasyrda Jambyl oblysynda qyzǧaldaq gülın tamaşalau sirek kezdesetın jäne qūndy mümkındık. Qyzǧaldaq gülın qorǧaudaǧy bastamalaryŋyzǧa sättılık tıleimın! – dedı ol.
Sondai-aq IýNESKO-nyŋ jahandyq geopark jönındegı Qazaqstan ūlttyq komitetınıŋ töraǧasy Saida Nyǧmatova, geologiia-mineralogiia ǧylymdarynyŋ kandidaty Tatiana Pirogova, «Jabaǧyly-Manas» Tau kluby QB töraǧasy Elena Efimova, «Jabaǧyly-Manas» Tau kluby QB jobalarynyŋ üilestıruşısı Rauf Säbitov söz söiledı.
Konferensiia qorytyndysy boiynşa qarar qabyldandy.
