Qazaqstanda qazaq tılın bıletın halyq ülesı 86 paiyzǧa jettı. Būl turaly QR Parlamentı Senatynyŋ Töraǧasy Mäulen Äşımbaev aitty, dep habarlaidy “Adyrna” ūlttyq portaly QazAqparat saityna sılteme jasap.
«Ekonomikalyq jäne äleumettık jaŋǧyrudyŋ äleumettık bazasy jäne qozǧauşy küşı retınde orta sanattyŋ qalyptasuy da maŋyzdy özgerıs sanalady. Täuelsızdık jyldarynyŋ ışınde azamattarymyzdyŋ ortaşa tabysy 13 eseden astamǧa artqanyn aitsaq da jetkılıktı. Käsıpkerler qatary da artyp keledı. Jeke bizneste jūmys ıstep tūrǧan subektıler sany 2021 jyldyŋ 1 qaŋtarynda 1,4 mln-dy qūrady. 2005 jyldan bastap būl üş esege juyq ösımdı qūraidy», - dedı Senat spikerı Qazaqstan äleumettanuşylarynyŋ VII kongresınde.Onyŋ atap ötuınşe, urbanizasiia qazaqstandyq qoǧamnyŋ äleumettık stratifikasiiasyna yqpal etetın maŋyzdy trendterdıŋ bırı sanalady. Täuelsızdık jyldary qala halqynyŋ sany 9 mln-nan 11 mln-ǧa deiın artyp otyr.
«30 jyldyŋ ışınde eldıŋ demografiialyq beiını, halyqtyŋ etnikalyq qūramy özgerıp, jaŋa tıldık orta qalyptasty. Qazaq tılın bıletın halyqtyŋ ülesı 86 paiyzǧa jettı. Būl rette qazaqstandyqtardyŋ 92 paiyzy orys tılın bıledı. Bız – jas ūltpyz. Qazaqstandyqtardyŋ ortaşa jasy şamamen 32-nı qūraidy. Sonymen qatar ömır süru ūzaqtyǧy da ūzaryp keledı», - dedı Mäulen Äşımbaev.
”Adyrna” ūlttyq portaly
Ūqsas jaŋalyqtar
