Şymkent qalasynyŋ äkımı Mūrat Äitenov Asar-2 şaǧynaudanyndaǧy №138 mektepte tūrǧyndarmen kezdesıp, infraqūrylym jüielerınıŋ qūrylys barysyn pysyqtady.
Eldı mekendı auyz sumen qamtu boiynşa merdıger «Saryaǧaş-aman» JŞS tarapynan ötken jyly su jüielerınıŋ qūrylysy aiaqtalyp, paidalanuǧa berıldı. «Remstroi Almaty» JŞS tarapynan 87,2 şaqyrym elektr jüielerınıŋ qūrylysy jürgızıldı.
50,04 şaqyrym gaz jüielerınıŋ qūrylysy aiaqtalǧan. Kärız jüiesımen qamtu boiynşa «Monolit dizain» JŞS qūrylys jūmystaryn qolǧa alǧan. Kärız jüielerınıŋ ūzyndyǧy – 39,6 şaqyrym. Qazırgı taŋda qūrylys jūmystarynyŋ 40 %-y oryndaldy. 2022 jyly qazan aiynda aiaqtau josparda.
Bügıngı taŋda jeke investor qarajaty esebınen Qaratau audany aumaǧyndaǧy bırqatar şaǧynaudandar joǧary jyldamdyqty internetpen qamtyldy. Asar-2 şaǧynaudanyn optika jelısımen qamtamasyz etu 2022 jyldyŋ josparyna engızıldı.
Aldaǧy uaqytta şaǧynaudandy tolyqtai talşyqty optika jelısımen qamtu jūmystary jürgızıledı. Bügıngı taŋda investor tarapynan internet jelısın jürgızuge qajettı qūral-jabdyqtar alynuda.
Qala äkımı eldı mekenderde är salalyq baǧyt boiynşa auqymdy jūmystar atqarylǧanyn, mūnyŋ bärı de azamattar üşın laiyqty ömır sapasyn qamtamasyz etuge baǧyttalǧanyn jetkızdı. Jaily qalanyŋ kelbetı ärbır eldı mekende körınıs tauyp, ärbır tūrǧyn qalamyz üşın maqtanatyndai därejede boluy tiıs dedı.
Şymkent qalasy äkımdıgınıŋ baspasöz qyzmetı
