Túrkistan oblysyndaǵy órt saldarynan myńnan astam qoı qyryldy, dep habarlaıdy «Adyrna» tilshisi.
«2022 jyldyń 31 qańtarynda saǵat 7.15-te 101 pýltine Báıdibek aýdanynyń Alǵabas aýylynan 5 shaqyrym jerde sharýa qojalyǵynyń aýmaǵynda eki qabatty ǵımarat órtengeni týraly habarlama tústi. Ǵımarattyń birinshi qabatynda qara mal, al ekinshi qabatynda shóp turǵan bolatyn. Sharýa qojalyǵy men jaqyn jerdegi órt sóndirý bólimi arasyndaǵy qashyqtyq 40 shaqyrymdy quraıdy. Órt sóndirýshiler oqıǵa ornyna 40 mınýtta jetken»,– dedi QR TJM resmı ókili Talǵat Ýálı.
Órt saldarynan 1 150 bas qoı qyrylyp, 150 tonna shóp janyp ketti. Oqıǵa ornynan qoıshynyń denesi tabyldy.
Aıta keteıik, órtti sóndirýge Túrkistan oblysy TJ departamentiniń 15 órt sóndirýshisi men 4 birlik tehnıkasy jumyldyryldy.
«Adyrna» ulttyq portaly
