Qala äkımı Mūrat Äitenov osy jyldyŋ basynda bastalǧan Bäidıbek bi jäne Arǧynbekov köşelerınıŋ qiylysyndaǧy jolairyq qūrylys alaŋynda bolyp, jūmystarmen tanysty.
Qaladaǧy kölık qozǧalysyn retteudıŋ keşendı josparyna säikes, Bäidıbek bi daŋǧyly men Arǧynbekov köşesınıŋ qiylysynda 2022-2023 jyldar aralyǧynda üş deŋgeilı jolairyqtyŋ qūrylysy jürgızıledı.
Jolairyqtyŋ tehnikalyq sipatyna säikes, Bäidıbek bi daŋǧylynda 700 metr, Arǧynbekov köşesınde 921 metr köşe aralyǧy qūrylys aumaǧyna engen. Qūrylys jospary boiynşa enı 80 metrlı 4-6 jolaqty avtomagistral salynyp, jol jiegıne jaiau jürgınşıler jäne velojol töseletın bolady.
Mūrat Äitenov atqarylǧan jūmystardy körıp, merdıger men sala jetekşısıne qūrylys jūmystarynda kemşılıkterdı boldyrmaudy, sapasyna basa nazar audarudy jäne bölıngen qarajatty tiımdı jūmsap, belgılengen merzımde aiaqtaudy tapsyrdy. Sonymen bırge, kölık keptelısı sekıldı qolaisyzdyqtardy boldyrmau üşın köşe qozǧalysyn şekteu jūmystaryn dūrys ūiymdastyrudy aitty.
Jolairyq qūrylysyna bailanysty Arǧynbekov köşesınde Bäidıbek bi köşesınen Jüsıpov köşesıne deiıngı aralyqtaǧy kölık qozǧalysyna uaqytşa şekteu qoiylǧan. 30 qaŋtar künı batystan şyǧysqa qarai Baitūrsynov köşesınen Bäidıbek bi daŋǧylyna deiıngı aralyq jabyldy.
Kölık qozǧalysy üşın Arǧynbekov köşesıne alternativtı magistraldar retınde Rysqūlov jäne Tölemetov köşelerı belgılengen.
Qazırgı uaqytta atalmyş qūrylys nysanynda Arǧynbekov köşesı boiymen jer qazu jūmystary atqaryluda.
Şymkent qalasy äkımdıgınıŋ baspasöz qyzmetı
