Bügın qala äkımı Mūrat Äitenov Nūrşuaq şaǧyn audany tūrǧyndarymen bolǧan kezdesude ai saiyn ötkızıletın jeke qabyldaudan bölek, är toqsannyŋ bır aiyn tūrǧyndarmen kezdesuge arnaitynyn jetkızdı. Jyl basynan berı özektı mäselesı bar 32 şaǧyn audan men tūrǧyn alab halqynyŋ mäselesın tyŋdaǧanyn atap öttı.
Abai audanyna qarasty būl şaǧyn audan tūrǧyndaryn sapaly elektr jaryǧy men tabiǧi gaz, mektep, emhana, köşelerge şaǧal tas töseu, qoǧamdyq kölık pen Äl-Farabi köşesıne şyǧatyn balama jol qarastyru mäselesı tolǧandyryp otyr.
Äkım köterılgen mäselelerdıŋ şeşu jolyn sala jetekşılerımen talqylap, jergılıktı tūrǧyndarǧa jūmystyŋ atqarylu barysyn tüsındırdı.
«Şaǧyn audannyŋ özektı mäselesın eskere otyryp, eŋ aldymen gaz, jaryqty şeşudı qolǧa aldyq. Özderıŋız körıp otyrǧandai byltyr taza auyz sumen tolyq qamtyldyŋyzdar. Bügıngı taŋda sapaly elektr quatyn jetkızu boiynşa jūmystar jürgızılude. Osy jyly gaz jüiesın tartu jūmystary bastalady. Onyŋ qūrylysy 2023 jyly aiaqtalady dep josparlanuda. Ötken jyly 14 köşege şaǧal tas töselse, auyz su jüiesı jürgızılgen 6 şaqyrym jolǧa biyl şaǧal tas töseletın bolady. İnjenerlık kommunikasiialardyŋ qūrylysy aiaqtalǧanda joldardy asfalttau jūmystary bastalady»,-dedı äkım.
Būdan bölek, şahar basşysy 2023 jyly Nūrşuaq şaǧyn audanyna 1200 oryndyq mektep salynatynyn, ekı eldı mekenge ortaq emhana qūrylysy Yntymaq şaǧyn audanynda jeke investor esebınen salynyp jatqanyn atap öttı. Zamanaui emhana täulıgıne 500 adamǧa qyzmet körsetuge qauqarly.
Söz soŋynda tūrǧyndar äkımge aşyq dialog tärtıbındegı kezdesuı üşın alǧysyn bıldırıp, jūmystyŋ sapaly jürgızıluıne atsalysatyndaryn aitty.
Şymkent qalasy äkımdıgınıŋ baspasöz qyzmetı
