Şymkent qalasynda halyqty sapaly internetpen qamtamasyz etu jūmystary qarqyndy jürude. 2025 jylǧa qarai üşınşı megapolistı jüz paiyz mobildı jäne talşyqty-optikalyq internet jelısımen qamtu közdelude. Būl turaly qalalyq sifrlandyru basqarmasynyŋ basşysy Äset Abdrahanov mälımdedı.
Äset Maratūlynyŋ aituynşa, internet sapasyn arttyru maqsatynda ötken jyly qalalyq äkımdık Maŋǧystau oblysynan ekı ırı investor tartqan. Bügıngı taŋda şaharda internet bailanysyn jaqsartumen «Qazaqtelekom» AQ-dan bölek jeke investorlyq kompaniialar da ainalysyp jatyr.
— Ötken jyly Şymkenttıŋ 10 eldı mekenı sapaly internetke qosyldy. 14 bazalyq stansiia ornatyldy. Biyl 15 eldı meken sapaly internet jelısımen qamtylady. Qazırgı taŋda qalanyŋ 60 paiyzy talşyqty-optikalyq, 91 paiyzy mobildı internetke jalǧanǧan. Bazalyq stansiia ornatylmaǧan 22 eldı meken ǧana qaldy. İnternet bailanysyna qosylu 10 myŋ, al ai saiynǧy tölem 6 myŋ teŋgenı qūraidy. Osy tūsta aitarym, tūrǧyndar internetke qosyluda belsendılık tanytqany jön. Öitkenı abonentter sany köp bolsa, investorlardyŋ da jūmys tiımdılıgı artady, - dedı Ä.Abdrahanov.
Talşyqty-optikalyq kabel tartu ısımen ainalysuşy investordyŋ bırı «SAS Telecom» JŞS. Kompaniia ökılı Nūrsäbit Saparbekovtıŋ aituynşa, byltyr Säule şaǧynaudanyn sapaly internetke qosuǧa 50 mln. teŋge ūarjy jūmsaǧan. Qazırgı taŋda Zabadam eldı mekenıne internet jelısın tartu jūmystaryn aiaqtau üstınde. Keiıngı kezekte Qazyǧūrt, Qūrsai, Badam-1 jäne Qarabastau eldı mekenderı sapaly internetpen qamtamasyz etıledı.
— Säule şaǧynaudanynda 300 abonent bar. Sonyŋ 40 paiyzy internetke qosylǧan. Zabadam eldı mekenınde internet bailanysy jelısın tartu ısın 70 paiyzǧa aiaqtadyq. Oǧan 30 mln. teŋge qarjy jūmsaldy. 20 şaqyrym talşyqty-optikalyq jelı tartyldy. Kabeldı internet otbasy üşın öte tiımdı ärı arzan. Wi-Fi qūrylǧysymen otbasynyŋ barlyq müşesı internetke eş kedergısız qosyla alady. Bügıngı taŋda internet bailanysynyŋ ortaşa qūny kemı 2,5 myŋ teŋge tūrady. Otbasy müşelerınıŋ ärqaisysyn qosqanda onyŋ qūny 10 myŋ teŋgeden asyp ketedı. Al üidegı kabeldı internetke bar-joǧy 6 myŋ teŋge töleidı. Sondyqtan talşyqty-optikalyq internet bailanysy otbasylyq biudjet üşın sonşalyqty qymbat emes, - dedı Nūrsäbit Nūrhodjaūly.
Zabadam eldı mekenınıŋ tūrǧyny, mektep mūǧalımı Zülfiia Saidazova kabeldı internet jelısı tartylatynyn estıgende erekşe quanǧanyn aitady. Öitkenı pandemiiaǧa bailanysty karantin uaqytynda sabaq onlain rejimıne auysqan kezde sapaly internetsız ıs önbeitının ūǧynǧanyn jetkızdı. Sondyqtan eldı mekenge kabeldı internet keldı degen kezde bırınşı bolyp talşyqty-optikalyq ǧalamtor jelısın üiıne ornatqan.
Jalpy, Prezidet tapsyrmasyna orai tūrǧyndardy sapaly internetpen qamtamasyz etu, sifrlandyru baǧdarlamasyn sättı jüzege asyru maqsatynda üşınşı megapoliste auqymdy jūmystar qolǧa alynuda. Osyǧan bailanysty, mäselen, säulet, qala qūrylysy jäne jer qatynastary basqarmasy men energetika jäne infraqūrylymdy damytu basqarmasy jäne «Qazaqtelekom» AQ, "Kar-Tel" JŞS, "Ksell" AQ, «I-LinkNet.net, «SpesavtomatikaServis» JŞS, «Mobail Telekom-Servis» JŞS, «Şymkent qalasy boiynşa öŋıraralyq bailanys inspeksiiasy» men «Nūr-Astana Stroi» JŞS ökılderınıŋ qatysuymen juyrda ötken mäjılıstı atap ötuge bolady. Jiynda qala aumaǧyn jäne qaladan şalǧai ornalasqan eldı mekenderde internet sapasyn jaqsartu mäselesı qaraldy.
Änuar JŪMAŞBAEV
