Almatydaǧy Qazaqtelekom qyzmetkerlerı ötken jyldyŋ jeltoqsan aiynan berı jalaqy mäselesın köterıp, beibıt mitingke şyǧyp, talaptaryn aityp keledı. Basşylyqtyŋ beibereket äreketınen şarşadyq degen qyzmetkerler «erekşe qamqoryndaǧy» dındar ärıptesterı turaly aityp, ökpesın jetkızdı. Būl turaly Azattyq Rýhy saityna sılteme jasap, "Adyrna" ūlttyq portaly habarlaidy.
Aty-jönın aşyq jariialamaudy sūraǧan qyzmetkerler basşylyqqa Timur Hudaiberdiev keluınen keiın, namazhandarǧa degen erekşe qamqorlyq bastaldy deidı.
«Timur Telmanūlynyŋ bızge basşylyqqa keluımen namazhandarǧa degen erekşe qoldau bastaldy. Qazır ol «Qazaqtelekom» AQ töraǧasy Quanyşbek Esekeevtıŋ orynbasary. Būryn ol kısı satyp alu direksiiasynda bas direktor bolǧan, atalǧan filialdaǧylar Timurdyŋ keluınen keiın namaz uaqytynda dälızde qaz-qatar jainamaz jaiyp, qūlşylyǧyn oryndaityn bolyp kettı. Bıreuler «qūlşylyq jasai bersın, onda tūrǧan ne bar?» deitın bolar. Bıraq olardyŋ barlyǧynyŋ derlık balaǧy qysqa, saqaly ūzyn. Sosyn Almatynyŋ är filialyndaǧy dındarlardyŋ jalaqysyn köterıp, janyna jinai bastady. Mäselen, bes jyl jūmys täjıribem bar men jäne ekı jyl jūmys ötılı bar namazhan tūrsaq, lauazymdy qyzmetke bırınşı sony qoiady. Sebebı, ol sol jamaǧattan. Sol direksiiada kemınde 50 namazhan jūmys ısteidı», - dedı ol.
Eldegı ruşyldyq pen jerşıldıkten şarşaǧan mamandar endı būl tızımge kımnıŋ namaz oqyp oqymaityny qosyldy dep otyr.
«Qarapaiym injener bolyp jürgen namazhan jıgıttı Timur myrza bırden bas menedjer etıp taǧaiyndady. Negızı ol orynǧa bırneşe jyldyq täjıribesı bar maman sailanǧaly tūrǧan edı, Telmanūly bır telefon qoŋyrauymen dınşıl jıgıttı sailap jıberdı. Kez kelgen mekemede käsıbi şeberlık, jūmys ötılı bırınşı kezekte boluy kerek emes pe?! Namaz, qūlşylyq ol adamnyŋ jeke şaruasy. Basşylardyŋ ruşyldyq, jerşıldıgı azdai, endı kım namaz oqidy, kım oqymaidy dep mamandardy böler bolsaq, onda bız nesıne bälenbai jyl JOO-da oqu oqydyq», - deidı aşynǧan qyzmetkerler.
Soŋǧy kezde qyzmetkerlerı jalaqyny köterudı talap etıp jatqan Qazaqtelekom direktorlarynyŋ qyzyǧy mūnymen bıtpeidı. Şaǧymdanuşylardyŋ sözınşe, keŋsedegı jinalys kezınde basşy talap qoiǧandardy tıldeptı.
«Bırınşı aqpan künı Jelı divizony bırlestıkterınıŋ oblystardaǧy tehnikalyq direktorlarymen onlain jinalysy öttı. Atalǧan jinalysta bas direktor alkogol ışıp alǧandai körındı, sebebı etikaǧa sai emes sözder aityp, özın bırtürlı dörekı ūstady», - dedı Qazaqtelekom qyzmetkerı.
Sondai-aq, qyzmetkerler «Qazaqtelekom» AQ filialy bas direktory Bolat Erlanūlyna «Almatytelekom» TBS ūjymy jalaqy men basqa da problemalaryna qatysty jazbaşa ötınış jazǧan. Basşylyq qyzmetkerlerdıŋ talap-tılekterıne qatysty şaralardy kelesı apta aituǧa uäde berıptı.
«Bız «Qazaqtelekom» AQ filialy – «Almatytelekom» TBKB-nıŋ tehnikalyq blogy qyzmetkerlerınıŋ ūjymy lauazymdyq jalaqylardyŋ kemınde ekı ese ösuın talap etıp otyrmyz. Sebebı, käsıporyndaǧy qyzmetkerlerdıŋ ştattyq sanynyŋ qysqaruyna bailanysty oryndaityn jūmys kölemımız ūlǧaidy. Mındetterımız ben jauapkerşılık öskenımen, jalaqynyŋ ösetın türı bolmai tūr. Bızdegı qatardaǧy injenerlerdıŋ alatyn ailyǧy – 66 myŋ teŋge. Oilaŋyzşy, ony qaida jetkızuge bolady. Elde kün saiyn azyq-tülık, päter baǧasy qymbattap jatyr. Odan bölek, arnaiy mamandardyŋ jūmysta kietın qyzmettık kiımderı, aiaq kiımderı, tehnikalyq qūraldarynyŋ barlyǧy eskı. Qyzmettık kölıkterımız eskı, jaŋa kölıkterdı tek basşylyq qyzmettegıler qoldanady. Ölşeu qūraldary da jetkılıksız. Almatydaǧy Panfilov köşesı boiynda ornalasqan ǧimarattyŋ jartysyn jekemenşıkke satyp jıberıp, syimai qalǧan qyzmetkerlerdı stansiiaǧa jıbere saldy. Bır sözben aitqanda, bız siiaqty qatardaǧy qarapaiym qyzmetkerlerge jūmys ısteuge jaǧdai müldem jasalmaǧan. Bız eldegı özgerıstermen bırge jaǧdaiymyzdyŋ da özgergenın qalaimyz. Basşylyq «9 aqpan künı jinalys aşyp, bızge bır jauabyn aitamyz» dedı. Bıraq būl mäselenı bızdıŋ köterıp kele jatqanymyzǧa bırneşe uaqyt boldy, endı eldegı özgerıstermen bırge bızdıŋ de jaǧdaiymyz özgerıp qalar degen ümıttemız», - dedı qyzmetkerler.
Eske salsaq, 31 qaŋtar künı Almatyda «Qazaqtelekom» AQ qyzmetkerlerı jalaqyny köterudı talap etıp, narazylyqtaryn bıldırdı. Tehnikalyq bölımnıŋ qyzmetkerlerı bır kün jūmysqa şyqpai qoiǧan.
"Adyrna" ūlttyq portaly
