Pavlodarda Kutuzov köşesınıŋ atyn Täuelsızdık dep auystyru mäselesı qozǧalyp jatyr. Osyǧan orai, säuırdıŋ 27-ı künı saǧat 15:00-de qaladaǧy «Şaŋyraq» mädeni-sauyq ortalyǧynda jiyn ötpek, dep habarlaidy zhasalash.kz.
—Bız tūrǧyndardyŋ atynan, onyŋ ışınde Qazaqstan halqy assambleiasy ūiymynan aşyq hat aldyq. Onda qazırgı Kutuzov köşesın «Täuelsızdık» dep auystyru kerek degen ūsynys jazylǧan,- deidı Pavlodar qalasy mädeniet jäne tılderdı damytu bölımı jetekşısınıŋ mındetın atqaruşy Meiram NŪǦYMAN.
Al kerekulıkterdıŋ būl ūsynysqa közqarasy är türlı.
— Eldı-mekennıŋ, köşenıŋ ataulary el üşın, halyq üşın, ūrpaq üşın maŋyzdy. Kez kelgen sanaly adamnyŋ tūryp jatqan jerındegı köşe, auyl, qala atauynyŋ sebebın, tarihyn bıluge talpynu arqyly el tarihyna üŋılerı anyq. Qazaq tarihynda eşqandai atau tegın berılmegen. Tarihy bar, aŋyzy bar. Al endı qalamyzdaǧy Kutuzov köşesın özgertetın uaqyt baiaǧyda kelgen. Ony tıptı talqylap ta kerek emes. Kezınde sol köşelerge olardyŋ atauy berılgende bıreulerden rūqsat sūrap, aqyldasty ma eken? Keŋes Odaǧynyŋ däuırı jürıp tūrǧanda qoia salǧan ataular. Sondyqtan öz qolymyz öz auzymyzǧa jetkende qalanyŋ däl ortasyndaǧy alyp daŋǧyl boluǧa laiyq köşege qazaqi atau beru ūrpaq aldyndaǧy boryşymyz,-deidı Pavlodar qalasynyŋ tūrǧyny Arman HASENOV.
Pavlodarǧa Täuelsızdık kele me?
—Qajet emes. Kutuzov degen atauǧa äbden üirenıp aldyq. Būǧan qosa, būl qaladaǧy eŋ ūzyn köşe. Qanşama üidıŋ nömırı jazylǧan taqtaişasymen qosa, üi qūjattaryn da auystyru kerek. Būl qanşama şyǧyn ǧoi, būl qarapaiym jūrtty taǧy äbıgerge salady -deidı Pavlodar qalasynyŋ tūrǧyny Jūldyz QUANYŞEVA.
—Men būl köşe atauynyŋ Täuelsızdık dep özgeruın qoldaimyn. Būl beitarap maǧyna. Būǧan qosa, «Täuelsızdık» degen jaqsy estıletın siiaqty. Kutuzov degen de jaqsy, bıraq Täuelsız Qazaqstannyŋ öz tarihy bar ǧoi. Sondyqtan būl dūrys şeşım dep oilaimyn, -deidı jergılıktı aqparat agenttıgınıŋ tılşı Margarita ChUDAKOVA.
— Men būl ūsynysty tolyǧymen qūptaimyn. Öz kezınde būl eskı köşe ataulary bırneşe ret özgergen. Qazır da özgertetın kez keldı. Mäselen, Lenin köşesı 150 jyl ışınde tört ret auystyrylǧan eken. Bıluımşe, qazır Leninnıŋ aty berılgen köşeler körşı Reseide de qalmaǧan. Sondyqtan, egemen elımızdıŋ eskı, jaŋa köşelerınıŋ bärı jaŋalanuy tiıs dep oilaimyn, -deidı öŋırlık telearnanyŋ jürgızuşısı Möldır QAZYMBET.
Degenmen, köşe atauynyŋ özgerer, özgermesı köpşılık tyŋdalymyna kelgen azamattardyŋ pıkırıne tıkelei bailanysty bolmaq. Eger mūny maqūldaǧandardyŋ qatary qarsy taraptan köp bolsa, būl sūraq qalalyq mäslihattyŋ sessiiasyna joldanady. Keiın şyqqan şeşım respublikalyq onomatikalyq komissiianyŋ qarauyna jıberıluı tiıs. Jyl basynda Pavlodarda Lenin köşesı «Astanaǧa» auysqanyn aita keteiık.
Äigerım Jetpısova, Pavlodar Suretter avtordıkı
