"Qasırettı qaŋtar" oqiǧasynan keiın Semei qalasynda 6-qaŋtar künı Jandos Jotabaev, 10-qaŋtarda Eldos Qaliev ūstalǧan. Ekeuı de polisiianyŋ uaqytşa ūstau mekemesınen tırı şyqpaǧan. Denesınde ūryp-soǧu ızı qalǧan qos azamat ta jūmbaq jaǧdaida köz jūmǧan. Būl turaly Azattyq.org mälımdedı.
26 jastaǧy Eldos Qaliev 10 qaŋtarda joldastarymen bırge dosynyŋ äke atanyp, närestelı bolǧanyn toilaǧan. Tünde qaŋtar narazylyǧyna bailanysty engızılgen komendant saǧaty bastalǧannan keiın Eldos üiıne qaitqan. Eldostyŋ ınısı polisiia bölımşesıne barǧanda ınısınıŋ kölıgın körgen, alaida ony polisiia bölımşesıne kırgızbegen.
Artynşa polisiia qyzmetkerlerı şyǧyp, "ınıŋız qarsylyq körsetıp, qaza tapty" dep qysqa qaiyrǧan. Aidos ınısı turaly: "Mūrny, qabyrǧasy, sol jaǧy tolyq synǧan, omyrtqasyna üşkır zat tyqqan, belınen tömen qarai aiaǧynyŋ arty tügel kögerıp, qantalap ketken, basynda da däl sondai jaraqattar bar", - deidı.
Eldostyŋ denesın körgen dosy Talǧat İslamov bylai deidı: "Basqaşa aita almaimyn: ony öltırgen. Medisinalyq saraptama jasattyq, qabyrǧasy denesıne kırıp ketken, bır aiaǧy tügel kögergen, basy jarylǧan. Bükıl denesınde tepkınıŋ ızı bar. Tyrnaqtarynyŋ astyna ine jügırtken. Mūndaidy bırınşı ret kördım. Şymyr jıgıt emes edı, salmaǧy 60 kilogramǧa da jetpeitın. Adamdy osynşa aiuandyqpen öltıru degen... Saraptamada "asqazany ornynan jyljyp ketken" dedı. Är tyrnaǧyna ine tyqqan. Qanypezer, tıptı faşistıŋ özı būlai jasamaidy ǧoi. Halyqqa ant bergen qūqyq qorǧau organdary mūndaiǧa qalai bardy?" – deidı.
Semeidıŋ taǧy bır tūrǧyny 36 jastaǧy Jandos Jotabaev 6-qaŋtarda "mitingıge qatysqany üşın" ūstalǧan. 8 qaŋtarda Jandosty uaqytşa tergeu izoliatoryna auystyrǧan. Tergeu izoliatoryna tuystaryn, jaqyndaryn kırgızbegen. 17 qaŋtarda uaqytşa tergeu izoliatorynyŋ qyzmetkerlerı jedel järdem şaqyrǧan. Medisina qyzmetkerlerı Jandos Jotabaevtyŋ ölımın tırkegen.
"Mürdesın suretke tüsırıp aldyq, üstı-basy kök ala qoidai. Sau jerı joq. Denesın tılgen kezde plevrit, bır ökpesınde 750 millilitr, ekınşısınde 251 millilitr sūiyq zat bar degen qorytyndy jazyp berdı. 11 qabyrǧasy synǧan. Būl qaǧazdyŋ qaida ekenın bılmeimın. Soŋǧy qorytyndy bır aidan keiın berıledı dedı. Bıraq onda ne jazylatynyn bılmeimın, özıŋız de tüsınıp otyrsyz ǧoi", – deidı marqūmnyŋ ınısı Erdos Jotabaev.
Atalmyş qaiǧyly ıstermen adam qūqyqtary jäne zaŋdylyqty saqtau jönındegı qazaqstandyq biuronyŋ qūqyq qorǧauşysy Erlan Qaliev ainalysuda. 9 aqpanda ol Semei qalalyq prokuraturasy "Eldos Qaliev pen Jandos Jotabaevtyŋ ölımıne bailanysty Semei öŋırlık jemqorlyqqa qarsy küres qyzmetı qylmystyq kodekstıŋ 362-baby 4-bölımı ("bilıgı men qyzmet qūzyretın asyra paidalanudan bolǧan auyr saldar") boiynşa sotqa deiıngı tergeu amaldaryn bastady" dep mälımdegenın habarlady. Būl bap boiynşa bes jyldan on jylǧa deiın bostandyǧynan aiyru jazasy qarastyrylǧan.
"Adyrna" ūlttyq portaly
