Sebebi, jerdi menshigindeı satqan keıbir jemqor sheneýnikterdiń jalǵan qujat jasaýynan Pavlodar oblysy men Qaraǵandy oblysy arasynda 17 myń gektar jer aýadan paıda bolǵan. Eki oblystyń da salaǵa qatysty mamandary bul jerdi ózderine tıesili dep, qujat júzinde kórsetýde.
Daýly jer Qaraǵandy oblysynyń kartasynda Osakarovka aýdanyna tıesili dep kórsetilse, Pavlodar oblysynyń kartasynda Baıanaýyl aýdanyna jatady dep kórsetilgen. Al, Qaraǵandy oblysy jer basqarmasynyń qaǵaz kartasynda jer Pavlodar oblysy dep jazylyp tur.
Al, Qazaqstan Respýblıkasynyń kartasynda Pavlodar oblysy dep kórsetilgen.
Bul jerdi osy kúnge deıin Pavlodar oblysynyń sharýalary paıdalanyp kelgen. 2014 jyly jer daýy paıda bolǵanda eki oblystyń basshylary kezdesip, resmı qujat shyqqansha kim paıdalanyp otyr, solar paıdalana bersin degen qujatqa qol qoıǵan bolatyn. Biraq, osy daýly jerdi Qaraǵandy oblysynyń ákimdigi kásipkerlerge berip jibergen. Sonda bul jerdiń óz oblysyna tıesili emes ekenin bile tura Qaraǵandy oblysynyń jer bólimi qalaı ǵana kásipkerlerge bergen? QR Qylmystyq Kodeksiniń eki baby boıynsha ıaǵnı, qyzmet babyn asyra paıdalaný men jalǵan qujat jasaý negizinde is qozǵaýǵa bolady ǵoı. Bul istiń basy qasyndaǵylar bunyń artynda Qaraǵandylyq úlken aǵashkalar tur deıdi. Osy jerdiń daýy bastalǵanda aýyl turǵvndaryna qaraǵandylyq kásipkerler "artymyzda Nyǵmatýllın tur. Eshteńe isteı almaısyńdar" depti.
Osy máselede men túsinbeıtin 4 jaǵdaı bar jáne soǵan túsinikteme eshkim bermedi:
1. Jer resýrstaryn basqarý komıtetinen 2020 jyldyń 26 aqpanynda jaýap hat kelse, ózderi aıtqan jumys toby osy ýaqytqa deıin ne bitirdi? Bul másele Taýly Karabahtyń máselesi emes shyǵar 30 jyl sheshilmeıtin. Komıtet osy daýly máselege nege nemquraıly qarap otyr?
2. Komıtettin jaýap hatynda másele sheshimin tapqanǵa deıin jer ýchaskelerin berýdi toqtatý jóninde Pavlodar jáne Qaraǵandy oblystarynyń atqarýshy organdaryna usynys joldanǵany jazylǵan. Sonda Qaraǵandy oblysynyń atqarýshy organdary usynysty elemegeni me?
3. Qaraǵandy oblysy boıynsha aýmaqtyq jer ınspekııasy ǵımaratynyń ishinde ilinip turǵan jer kartasynda men ıelenip otyrǵan jer nege Pavlodar oblysyna qarasty bolyp tur? Ondaı bolsa Qaraǵandy oblysynyń kartasy eki túrli me? Nemese Qaraǵandy oblysynyń jaýapty mamandary óz oblysynyń jerin bilmeıdi me?(fotolar qosymsha usynylyp otyr)
4. Daýly jer ýchaskesin eki oblys ta óz esepterine kirgizip otyrsa, onda QR AShM Jer resýrstaryn basqarý komıteti osy ýaqytqa deıin qalaı esepterin qabyldap kelgen? Qabyldasa, memleketimizdiń jer kólemi 17 myń gektarǵa artyq kórsetilip, ótirik málimet jasalyp kelgen be? Olaı bolsa elimizdiń ár sharshy metr jerin esepke alyp, baqylap otyrǵan komıtettiń jaýapty mamandarynyń jumysyn qalaı baǵalaımyz? Bul úlken túıitkildi qoǵamdyq daýǵa ýshyqpaıdy ma? Osy suraqtarǵa jaýapty kimnen suraımyn?
Ońǵar QABDEN
