Bıyl jastar arasynda pedagogıkalyq baǵyttaǵy mamandyqtarǵa suranys artyp otyr. Bul týraly Sýleıman Demırel atyndaǵy ýnıversıtettiń rektory Davronjon Gaıpov málimdedi.
Qazaqstandyq mektep jáne kolledjderdiń 7685 túlegi respýblıkalyq SPT-2022 olımpıadasyna qatysyp jatyr. Intellektýaldyq saıysta úzdik dep tanylǵan 264 qatysýshy SDÝ-da 4 jylǵa jaramdy 100% grant pen 50%, 30% arnaıy jeńildikterge ıe bolady. Jyl saıynǵy olımpıada bıyl 6-13 naýryz aralyǵynda ótedi.
Rektordyń aıtýynsha, bıyl olımpıadaǵa qatysýshylardyń arasynda eki shet tili, IT jáne Bıznes mektebiniń mamandyqtaryna qyzyqqandar kóp. Alaıda, pedagogıkalyq baǵyttaǵy mamandyqtarǵa suranys áldeqaıda joǵary. Ýnıversıtet basshylyǵy onyń sebebin túsindirdi.
«Osy ýaqytqa deıin IT baǵytyna qyzyǵýshylyq tanytatyndar sany kóp bolǵan. Al bıyl 8 jylda alǵash ret túlekter arasynda pedagogıkalyq mamandyqtarǵa suranys kúrt artty. Oǵan ýnıversıtetimizde pedagogıkalyq baǵytta kadrlardy daıarlaıtyn jańa mamandyqtar ashylýy sebep boldy. Olar: «Pedagogıka jáne psıhologııa», «Mektepke deıingi oqytý jáne tárbıeleý», «Bastaýysh oqytýdyń pedagogıkasy men ádistemesi», «Áleýmettik pedagogıka jáne ózin-ózi taný» mamandyqtary.Bolashaq muǵalimderdi daıarlaýǵa, pedagogterdiń mártebesin kóterýge basymdyq beremiz. Sondaı-aq pedagogıkalyq baǵytta oqıtyn stýdentterdiń shákirtaqysynyń ósýi de mamandyqtyń mártebesin kóterýge yqpal etti», – dedi Davronjon Gaıpov.
Olımpıadany uıymdastyrý komıtetiniń sheshimi boıynsha I kezeńnen 25 upaıdan joǵary jınaǵan 3284 qatysýshy ótti. Olar 50 logıkalyq suraqqa onlaın túrde jaýap berdi. Bilim dodasynyń II kezeńi oflaın formatta 13 naýryz kúni saǵat 11:00-de elimizdiń 17 qalasynda bir ýaqytta ótedi. Qatysýshylar testileýdi Almaty, Nur-Sultan, Shymkent, Taraz, Qyzylorda, Atyraý, Aqtaý, Aqtóbe, Oral, Kókshetaý, Qostanaı, Qaraǵandy, Pavlodar, Semeı, Óskemen, Taldyqorǵan, Túrkistan qalalarynda tegin tapsyrady.
II týrda beıindik pánder boıynsha 100 test tapsyrmasyn oryndaýǵa 150 mınýt, ıaǵnı 2,5 saǵat ýaqyt beriledi. Olımpıadaǵa qatysý arqyly grant utyp alǵan túlekter UBT-da shekti baldy mindetti túrde jınaýy tıis.
SPT olımpıadasy arqyly Halyqaralyq quqyq mamandyǵyna grantqa túsken Dıdar Berenbaev qatysýshylarǵa sáttilik tiledi.
«2018 jyly olımpıadaǵa qatysyp bilimimdi synap kórdim. Nátıjesinde 100% grant ıegeri atandym. Olımpıadanyń arqasynda elimizdiń úzdik ýnıversıtetteriniń birinde grant az bólinetin «Halyqaralyq qatynastar» mamandyǵyn tegin oqyp jatyrmyn. Qatysýshylarǵa aıtarym, SPT – bilim deńgeıińdi anyqtaýǵa jáne UBT aldynda senimdilikti arttyrýǵa taptyrmas múmkindik. Ózińe jáne aqylyń men bilimińe sen. Sáttilik tileımin», – dedi 4 kýrs stýdenti.
”Adyrna” ulttyq portaly
