بيىل جاستار اراسىندا پەداگوگيكالىق باعىتتاعى ماماندىقتارعا سۇرانىس ارتىپ وتىر. بۇل تۋرالى سۋلەيمان دەميرەل اتىنداعى ۋنيۆەرسيتەتتىڭ رەكتورى داۆرونجون گايپوۆ مالىمدەدى.
قازاقستاندىق مەكتەپ جانە كوللەدجدەردىڭ 7685 تۇلەگى رەسپۋبليكالىق SPT-2022 وليمپياداسىنا قاتىسىپ جاتىر. ينتەللەكتۋالدىق سايىستا ۇزدىك دەپ تانىلعان 264 قاتىسۋشى سدۋ-دا 4 جىلعا جارامدى 100% گرانت پەن 50%، 30% ارنايى جەڭىلدىكتەرگە يە بولادى. جىل سايىنعى وليمپيادا بيىل 6-13 ناۋرىز ارالىعىندا وتەدى.
رەكتوردىڭ ايتۋىنشا، بيىل وليمپياداعا قاتىسۋشىلاردىڭ اراسىندا ەكى شەت ءتىلى، IT جانە بيزنەس مەكتەبىنىڭ ماماندىقتارىنا قىزىققاندار كوپ. الايدا، پەداگوگيكالىق باعىتتاعى ماماندىقتارعا سۇرانىس الدەقايدا جوعارى. ۋنيۆەرسيتەت باسشىلىعى ونىڭ سەبەبىن ءتۇسىندىردى.
«وسى ۋاقىتقا دەيىن IT باعىتىنا قىزىعۋشىلىق تانىتاتىندار سانى كوپ بولعان. ال بيىل 8 جىلدا العاش رەت تۇلەكتەر اراسىندا پەداگوگيكالىق ماماندىقتارعا سۇرانىس كۇرت ارتتى. وعان ۋنيۆەرسيتەتىمىزدە پەداگوگيكالىق باعىتتا كادرلاردى دايارلايتىن جاڭا ماماندىقتار اشىلۋى سەبەپ بولدى. ولار: «پەداگوگيكا جانە پسيحولوگيا»، «مەكتەپكە دەيىنگى وقىتۋ جانە تاربيەلەۋ»، «باستاۋىش وقىتۋدىڭ پەداگوگيكاسى مەن ادىستەمەسى»، «الەۋمەتتىك پەداگوگيكا جانە ءوزىن-ءوزى تانۋ» ماماندىقتارى.بولاشاق مۇعالىمدەردى دايارلاۋعا، پەداگوگتەردىڭ مارتەبەسىن كوتەرۋگە باسىمدىق بەرەمىز. سونداي-اق پەداگوگيكالىق باعىتتا وقيتىن ستۋدەنتتەردىڭ شاكىرتاقىسىنىڭ ءوسۋى دە ماماندىقتىڭ مارتەبەسىن كوتەرۋگە ىقپال ەتتى»، – دەدى داۆرونجون گايپوۆ.
وليمپيادانى ۇيىمداستىرۋ كوميتەتىنىڭ شەشىمى بويىنشا I كەزەڭنەن 25 ۇپايدان جوعارى جيناعان 3284 قاتىسۋشى ءوتتى. ولار 50 لوگيكالىق سۇراققا ونلاين تۇردە جاۋاپ بەردى. ءبىلىم دوداسىنىڭ ءىى كەزەڭى وفلاين فورماتتا 13 ناۋرىز كۇنى ساعات 11:00-دە ەلىمىزدىڭ 17 قالاسىندا ءبىر ۋاقىتتا وتەدى. قاتىسۋشىلار تەستىلەۋدى الماتى، نۇر-سۇلتان، شىمكەنت، تاراز، قىزىلوردا، اتىراۋ، اقتاۋ، اقتوبە، ورال، كوكشەتاۋ، قوستاناي، قاراعاندى، پاۆلودار، سەمەي، وسكەمەن، تالدىقورعان، تۇركىستان قالالارىندا تەگىن تاپسىرادى.
ءىى تۋردا بەيىندىك پاندەر بويىنشا 100 تەست تاپسىرماسىن ورىنداۋعا 150 مينۋت، ياعني 2,5 ساعات ۋاقىت بەرىلەدى. وليمپياداعا قاتىسۋ ارقىلى گرانت ۇتىپ العان تۇلەكتەر ۇبت-دا شەكتى بالدى مىندەتتى تۇردە جيناۋى ءتيىس.
SPT وليمپياداسى ارقىلى حالىقارالىق قۇقىق ماماندىعىنا گرانتقا تۇسكەن ديدار بەرەنباەۆ قاتىسۋشىلارعا ساتتىلىك تىلەدى.
«2018 جىلى وليمپياداعا قاتىسىپ ءبىلىمىمدى سىناپ كوردىم. ناتيجەسىندە 100% گرانت يەگەرى اتاندىم. وليمپيادانىڭ ارقاسىندا ەلىمىزدىڭ ۇزدىك ۋنيۆەرسيتەتتەرىنىڭ بىرىندە گرانت از بولىنەتىن «حالىقارالىق قاتىناستار» ماماندىعىن تەگىن وقىپ جاتىرمىن. قاتىسۋشىلارعا ايتارىم، SPT – ءبىلىم دەڭگەيىڭدى انىقتاۋعا جانە ۇبت الدىندا سەنىمدىلىكتءى ارتتىرۋعا تاپتىرماس مۇمكىندىك. وزىڭە جانە اقىلىڭ مەن بىلىمىڭە سەن. ساتتىلىك تىلەيمىن»، – دەدى 4 كۋرس ستۋدەنتى.
”ادىرنا” ۇلتتىق پورتالى
