Almatylyq aqsaqaldar ündeuı
Qūrmettı jerlester! Almatylyq jastar!
Bız, Almaty qalasynyŋ aqsaqaldar qauymy qazır qoǧamda bop jatqan keibır jaǧdailarǧa qatysty asa alaŋdaulymyz. Rasyn aitu kerek, kütpegen jerden bastalǧan «qaiǧyly qaŋtar» oqiǧasy barşamyzdy eseŋgıretıp kettı. «Egemendık alyp, eŋse tıkteu äste-äste, eldıkten aiyrylyp qalu bır sätte» ekendıgın kördık. Syrttan synalap kırıp, qoǧamdy ışten ırıtkısı kelgen qaskünemder men qylmyskerler täuelsızdıgımızdıŋ tūǧyryn şaiqap, töŋkerıp tastai jazdady. Prezidentımızdıŋ der kezınde qabyldaǧan şūǧyl şeşımderı arqasynda, batyl täuekelge baryp, şiraq qimyldaǧanynyŋ nätijesınde ǧana kielı azattyǧymyzdy saqtap qala aldyq. Qoǧam ışınde jürıp, qarapaiym tūrǧyndarmen kündelıktı kezdesıp jürmız. Sol azamattar qazır köşede toptasqan adamdar toby körınse, üreilenıp, şoşityndaryn aitady. Beibıt halyq qatty qorqyp qalǧan. Äsırese, Almaty qalasy sodyrlardyŋ soiqanynan köp zardap şektı. Qanşama ǧimarat örtke oranyp, sauda oryndary tonalyp, adam şyǧyny oryn aldy. Bügıngı taŋda qala äkımdıgı sol oqiǧalardyŋ saldaryn joiuǧa baryn salyp jatyr. Qiraǧan, örtengen ǧimarattar men sauda oryndaryn qalpyna keltırıp, şyǧynǧa batqan käsıpkerlerdı qoldap, jastarǧa jaŋa jūmys oryndaryn aşuǧa ärekettenude. Bızge qazır osy ötken oqiǧalardy dūrystap saralap, salqyn aqylmen, saliqaly sabyrmen ketken qatelıktermen jūmys jasau qajet. Ol üşın qoǧamnyŋ tynyştyǧy men tūraqtylyǧy asa maŋyzdy. Ökınışke qarai, keiıngı kezde, Almatymyzda şeruletken mitingıler men aiqaiǧa attan qosqan jiyndar qaitadan köbeiıp kettı. Onyŋ özı baiyrqaly jiyn, basalqy keŋes qūru bolsa qūba-qūp. Qalyŋ toptyŋ ortasyna kırıp alyp, keibır terıs piǧyldy, aram oily arandatuşylar el arasyna ırıtkı salatyn ūrandar köterıp, qoǧam şaŋyraǧyn şaiqap, bırlıgımızdı ırıtudı közdegendei. Söz joq, qazaq halqynyŋ tarihynda «Kültöbenıŋ basynda künde jiyn jasaityn» zaman boldy. El aǧalary bas qosyp, alqa qūryp aqyl-keŋesterımen bölıstı. Bıraq, onyŋ basty erekşelıgı – jön sözge toqtaityn halyq boldy. Ataly sözge qūlaq asyp, paryqty pıkırge bas ietın mınez bar edı. Bügıngı bas qosular kerısınşe daŋǧaza dabyr men beipıl sözderge ūlasyp, qisyq-qyŋyr, qysyr qiqularǧa tolyp kettı. Oiǧa aludyŋ özı ūiat sanalatyn anaiy sözderdı qaǧazǧa jazyp, ūran qylyp ūialmai kökke köterudı sän köretın siyqsyz salt paida boldy. Bügıngı uaqyt aumaly-tökpelı zaman bolyp tūr. Ainalymyzdaǧy memleketterdıŋ tynyştyǧy bır sätte būzylyp, beibıt tūrǧyndary şūbyryp, memleket soǧys otyna oranyp jatqanyn körıp jatyrmyz. Bızge qazır ışkı tynyştyq pen myzǧymas tūraqtylyq auadai qajet. Jastardy, jalpy qoǧamdy sabyrǧa şaqyramyz! Etek-jeŋımızdı jiyp, qazırgı ötpelı kezeŋde jūdyryqtai jūmylyp, ūiymşyldyq tanytaiyq. Ainalamyzda, el ışınde oryn alyp jatqan keibır qiynşylyqtardyŋ barlyǧy uaqytşa. El Täuelsızdıgınıŋ kepılı – tatulyq pen bırlıkte. Elımızdıŋ tynyştyǧy būzylmasyn deimız. Bızdıŋ atalyq tılegımız, aqsaqaldyq nietımız osy. El ışıne kırıp, ylaŋ saluy közdeitın arandatuşylardan saq bolaiyq. Qoǧam bolyp jūmylyp, bırtūtas halyq bolyp bırıgıp, Prezidentımızdıŋ ainalasyna toptasa alsaq uaqytşa synaqtardyŋ barlyǧyn erkın eŋseremız. Elımız aman, jūrtymyz tynyş, zamanymyz beibıt bolsyn! Qol qoiǧandar- Asanälı Äşımov
- Mūrat Äuezov
- Dulat İsabekov
- Kädırbek Segızbaev
- Smaǧūl Elubaev
- Beksūltan Nūrjekeev
- Säule Dosjan
- Sät Toqpaqbaev
- Jürsın Erman
- Temırhan Medetbek
- Zeinep Ahmetova
- Marfuǧa Aithojina
- Aiagül Mirazova
- Aqan Bijanov
- Naǧaşybek Qapalbekūly
- Töregeldı Şarmanov
- Mekemtas Myrzahmetov
- Säbit Orazbaev
- Altynbek Qorazbaev
- Bibıgül Tölegenova
- Seiıt Qasqabasov
