Parlamenttegilerdiń memlekettik tildi meńgerýi úshin mıllıondaǵan qarjy bólinip jatyr, dep habarlaıdy "Adyrna" portaly Ulysmedia.kz saıtyna silteme jasap.
«Materıaldyq-tehnıkalyq qamtamasyz etý basqarmasy» degen mekeme memlekettik til boıynsha trenıngter ótkizý úshin 27 mln teńge jumsamaq.
Memlekettik satyp alý portalynynyń dereginshe, mekeme 11 aqpan kúni «Parasat» jeke kásipkerligimen kelisimshart jasaǵan. Tender «tikeleı bir kózden satyp alý» tásili arqyly ótken. Kelisimshartqa sáıkes, «Parasat» JK bıylǵy 25 jeltoqsanǵa deıin «tapsyrys berýshiniń 50 tyńdaýshysyna» memlekettik tilden trenıngter ótkizýge tıis. Qujatta «tyńdaýshylardyń» naqty kim ekeni aıtylmaǵan.
- «Materıaldyq-tehnıkalyq qamtamasyz etý basqarmasy» negizinen Parlamenttiń sharýashylyq jumystaryna jaýapty. Sondyqtan 50 «tyńdaýshynyń» depýtattar ekenin boljaýǵa bolady. Onyń ústine, tender tehsıpattamasynda trenıng ótkiziletin oryn retinde Parlament ǵımaraty men Májilis ǵımaratynyń mekenjaıy kórsetilgen.
Tehsıpattamada «qyzmettiń negizgi maqsaty – tapsyrys berýshiniń tyńdaýshylarynyń memlekettik tildi meńgerýine jaǵdaı jasaý» dep jazylǵan. Soǵan qaraǵanda, depýtattarǵa memlekettik tildi úıretýdi de memleket óz moınyna alǵan sııaqty», – dep boljaıdy telegram-arna ıesi, jýrnalıst Mııat Káshibaı.
«Materıaldyq-tehnıkalyq qamtamasyz etý basqarmasy» óz «tyńdaýshylaryna» til úıretý úshin bıyl ǵana qyrýar qarjy bólmegen. Memsatyp alý portalyndaǵy aqparatqa qaraǵanda, mekeme 2016 jyldan beri «tyńdaýshylaryna» til úıretý maqsatynda 14 kelisimsharttyń barlyǵyn «Parasat» jeke kásipkerligimen jasasqan. Onyń ústine, barlyq tender «tikeleı bir kózden satyp alý» tásili arqyly ótken. Iaǵnı, mekeme ashyq konkýrs ótkizbegen, tek bir kompanııamen kelisimshart jasasa bergen. Nátıjesinde, «Parasat» JK 2016 jyldan beri atalǵan mekemeden 285 mln teńge jýyq qarjy alǵan.
- «Parasat» JK ıesi – Maqpal Murtazaeva degen adam. Ashyq derekkózderde ol jaıly aqparat joq. Bizge belgilisi – Murtazaeva osy ýaqytqa deıin tek «Materıaldyq-tehnıkalyq qamtamasyz etý basqarmasyna» ǵana qyzmet kórsetip kelgen. Óıtkeni portalda basqa mekemeden tender alǵanyn kezi joq», – dep túıgen telegram-arnadaǵylar depýtattardyń, jalpy Qazaqstan azamattarynyń memlekettik tildi úırenýi úshin bıýdjetten aqsha bólgen durys pa degen syńaıda saýal qoıady.
"Adyrna" ulttyq portaly
