Qazaqy naqyshta bezendirilgen aqshańqan kıiz úıler, ulttyq kıim kıip, júzderinde kúlki oınaǵan qýanyshty jandar, sharyqtaǵan án men kúı jáne qazaqtyń ulttyq taǵamdary qoıylǵan aq dastarhan... Osynyń bári Shymkenttegi naýryz toıynyń sán-saltanatyn kirgizip tur.
Iá, bıyl Shymkentte Naýryz joǵary deńgeıde uıymdastyrylyp, shyn mánindegi jalpyhalyqtyq meıramǵa aınaldy. Ulystyń uly kúnine oraı, úshinshi megapolıste 10 jerde merekelik baǵdarlamalar ótip, turǵyndar men qala qonaqtaryna kóterińki kóńil-kúı syılady.
«Naýryz-Dýman» atty merekelik shara «Shymqala» etnoaýylynan bastaý aldy. Tarıhı keshende ótken sharaǵa qala ákimi Murat Áıtenov qatysyp, turǵyndardy Ulystyń uly kúnimen quttyqtady.
— Ǵasyrlar qoınaýynan jetken Ulystyń uly kúni, jyl basy – tabıǵattyń ǵana emes, adamzat rýhynyń da jańarýynyń belgisi. Bul meıram barshamyzdy birlik pen tatýlyqqa shaqyryp, ortaq iske jumyldyrady. Naýryz – Shymkentten bastaý alady. Dástúrli merekemizge basymdyq berý maqsatynda naýryz aıynyń árbir kúnin erekshe atap ótýdi qolǵa aldyq. Osylaısha ulttyq qazynamyz ben tarıhı qundylyqtarymyz, halqymyzdyń salt-dástúri dáriptelýde. Elimizdi shýaǵyna bólegen Ulystyń uly kúni ár shańyraqqa mereıli shattyq, mol yrys pen myzǵymas yntymaq syılasyn, — dedi Murat Dúısenbekuly.
Merekede respýblıkaǵa tanymal estrada ánshisi Aıgúl Imanbaeva men «Hazar» ulttyq-folklorlyq toby jáne dástúrli ónerdiń kórnekti ókilderi ánnen shashý shashty.
Naýryz kúni Shymkenttiń ortalyq saıabaǵyna kóp halyq jınaldy. Bul jerde Ál-Farabı aýdany ákimdigi, qalalyq basqarmalar men ózge de mekemeler kıiz úı tigip, qonaqtarǵa Naýryz kóje men ulttyq taǵamdardy usyndy. Qala ákimi birneshe kıiz úıdi aralap, kópshilikti merekemen quttyqtady.
Ortalyq saıabaqqa kelgen turǵyndar kir tasyn kóterý, láńgi, arqan tartý jáne ózge de ulttyq sport túrleri men oıyndar boıynsha ótken saıystardy tamashalady.
Shahar basshysy atalǵan eki merekelik sharada da táı-táı basqan sábılerdiń tusaýyn kesip, olarǵa aq jol tiledi.
Naýryz toıyn joǵary deńgeıde toılaýǵa Shymkent qalalyq Qazaqstan halqy Assambleıasy men etnomádenı birlestikter de óz úlesterin qosty.
Assambleıa ǵımaratynyń aldyna kız úı tigilip, dastarhan jaıyldy. Al, qurmetti qonaqtar men qala turǵyndary etnomádenı birlestik ókilderiniń «Armysyń, áz-Naýryz!» atty saltanatty konertin tamashalady. Onda ártúrli etnos ókilder óz ónerlerin ortaǵa saldy.
Qonaqtar merekelik dastarhannan dám alyp, qala turǵyndaryna Naýryz kóje men baýyrsaq usynyldy. Osylaısha, Ulystyń uly kúninde baýyrmaldyq pen qonaqjaılyqtyń jarqyn úlgisi dáripteldi.
Munan bólek, Shymkenttegi Arbatta qolóner buıymdarynyń jármeńkesi uıymdastyrylsa, Ál-Farabı alańynda Marjan Arapbaeva, Turar Rahymberlın, Aqerke Tájibaeva syndy otandyq estrada juldyzdary óner kórsetti. Jınalǵan jurt Naýryz kójeden dám tatty.
Naýryz merekesine oraı dendrosaıabaqta talantty jastardyń qatysýymen túrli baıqaýlar men ınteraktıvti eko-baǵdarlamalar uıymdastyryldy.
«Shymkent ırktiń» aldyna jınalǵan kópshilik ırk ártisteri men saıqymazaqtardyń jáne akrobattardyń ónerin tamashalaý múmkindigine ıe boldy.
Sonymen qatar Jeńis, Metalýrgter saıabaqtarynda jáne Qajymuqan atyndaǵy ortalyq stadıonnyń aldynda merekelik is-sharlar ótip, qala turǵyndaryna kóterińki kóńil kúı tartý etti.
