Tabıǵat ananyń býsanyp, tirshilik tiriletin jańarý aıyn syrboıylyqtar bar sán-saltanatymen qarsy aldy. Ortalyq alańda aqshańqan 18 kıiz úı tigilip, ulttyq salt-dástúrdi dáripteıtin sharalar, sport túrlerinen jarystar uıymdastyrylyp, mereke nyshany sanalatyn naýryz kóje ázirlenip, áserli án men jyr tógildi.
Kún men túnniń teńelip, qytymyr qystyń yzǵarynan qutylyp, kóktemniń shýaqty kúnderinen úmit kúttiretin Ulystyń uly kúninde oblys ákimi Gúlshara Ábdiqalyqova syrboıylyqtardy áz-Naýryz meıramymen quttyqtap, aqjarma tilegin jetkizdi.
- Kún menen tún teńelip, tirshilik ataýly oıanyp, aınala máre-sáre bolatyn Ulystyń uly kúni – jyl bastaýy áz-Naýryz barshańyzǵa qutty bolsyn!
Aq boz úıler tigilip, dastarhanymyz keńinen jaıylyp, jınalǵan jurt án men kúıge bólenip, abyr-sabyr bolatyn osy merekeni birazdan beri saǵyna kútkenimiz de ras. Eki jyldan beri álemdi jaýlaǵan pandemııa indeti saldarynan Naýryz meıramyn keń aýqymda ataı almadyq. Mine, bıyl indettiń beti qaıtyp, bárimiz emen-jarqyn atap ótýge múmkindik aldyq.
Memleket basshysy Qasym-Jomart Kemeluly Toqaevtyń naýryz aıynda Qazaqstan halqyna Joldaýyn arnaýy elimizdiń jańa tarıhı kezeńi tól jańa jylymyzdan bastalatynyn kórsetti.
Naýryz ár otbasyna qut bolyp ensin, yrys-nesibemiz mol bolsyn, shańyraqtardy shattyqqa keneltip, qýanyshqa toltyrsyn dep tileımin! Ulys oń bolsyn, aq mol bolsyn! – dedi Gúlshara Ábdiqalyqova.
Dýmandy sharada mártebeli qonaq bolǵan QR Parlamenti Senatynyń depýtattary Murat Baqtııaruly men Aqmaral Álnazarova jáne Májilis Tóraǵasynyń orynbasary Balaıym Kesebaeva elmen birge Naýryz toıyn toılap, Syr halqyna baq-bereke tiledi.
Óńir basshysy alańda tigilgen kıiz úılerge kirip, qazaqy dástúrmen búldirshinderdiń tusaýyn kesip, jyr-termeshilerdiń ónerin kórip, jurtshylyqpen birge Áz-naýryzdy qarsy aldy.
Merekege jınalǵan turǵyndar da taǵamdar men naýryz kójeden dám tatty.
Dýmandy sharada Syr halqyn otandyq estrada juldyzy "Dıeta.kz" toby quttyqtap, án shashýyn ala keldi. Ári qaraı jergilikti ónerpazdar merekeni dýmanǵa bólep, kóterińki kóńil-kúı syılady.
