Biyl Şymkentte 141 nysan qūrylys-jöndeu jūmystarymen qamtylady

Şymkent qalasy äkımınıŋ orynbasary Maqsūt İsahov şahardaǧy jol qūrylys jūmystarynyŋ barysy turaly BAQ ökılderıne baspasöz-brifingın ötkızdı. Tūrǧyndar arasynda Qonaev-Rysqūlov jolairyǧy men A-2 tas joly qūrylysy jäne äuejai maŋyndaǧy jaiau jürgınşıler joly, velojolaq sapasyna qatysty videolar men pıkırler taraǧan bolatyn. Maqsūt Pernebaiūly būl jaǧdailarǧa jan-jaqty jauap berdı. – Qonaev daŋǧyly boiynşa jerasty jaiau jürgınşıler ötkelın abattandyru jūmystary, sonymen qatar, jaŋbyr jäne qar sularyn baǧyttaityn suaǧar jüielerın ornatu tolyǧymen aiaqtalǧan joq. Qazırgı uaqytta jer asty ötkelınde jinalǧan su sorylyp, qalypqa keltırıldı. Al asfalt töseu jūmystary merdıger mekeme qarajaty esebınen atqarylady. Naqty aitqanda, qūrylysqa jauapty merdıger «Bazis-K» JŞS-nen Qonaev-Rysqūlov köşelerı qiylysyndaǧy jolairyq älı qabyldanǧan joq. Mausym aiynyŋ soŋyna deiın körsetılgen kemşılıkter joiylyp, qūrylys jūmystary aiaqtalatyn bolady. Al äuejai maŋyndaǧy 0,6 şaqyrym joldyŋ kärız jüiesın merdıger «EnSaf» JŞS jürgızgen. Endı atalǧan joldaǧy kemşılıkter jauapty merdıger tarapynan retke keltırıledı, – dedı qala äkımınıŋ orynbasary. Qalalyq jolauşylar kölıgı jäne avtomobil joldary basqarmasy tarapynan biyl jalpy 141 nysan qūrylys, jöndeu jūmystarymen qamtylady: qūrylys jäne qaita jaŋartu – 19 nysan (51,5 şaqyrym), ortaşa jöndeu – 121 nysan (223,8 şaqyrym, 291 köşe), kürdelı jöndeu – 1 nysan (19,3 şaqyrym). Sonymen qatar, 150 orynǧa aialdama ornatu jäne audan äkımşılıgı tarapynan bekıtılgen köşelerge şaǧal tas töseu josparlanuda. Ötken jyldyŋ nätijesı boiynşa qaladaǧy asfalt joldardyŋ ülesı 63,6 %-ǧa jetken edı. Asfalt jol ülesın 2022 jyly 67,4 %, 2023 jyly 71,2 %, 2024 jyly 75 %, 2025 jyly 79 %-ǧa ūlǧaitu josparda.