Soǵys bastalǵaly Qazaqstanǵa 130 myń Reseı azamaty kelgen, dep habarlaıdy ishki ister mınıstriniń birinshi orynbasary Marat Qojaev.
Májilis otyrysynda depýtattar Ýkraınadaǵy oqıǵaǵa baılanysty aqpan-naýryz aılarynda Reseı men Ýkraınadan qansha azamat Qazaqstanǵa kelgenin, qansha adam azamattyq pen yqtııarhat alýǵa ótinish bergenin surady.
Marat Qojaevtyń aıtýynsha, birinshi qańtardan beri respýblıkaǵa 457 myń sheteldik kelgen. Onyń deni – kórshi elderden, eń kóbi – ózbekter, ekinshi orynda – Reseı azamattary.
"24 aqpannan 11 sáýirge deıin 130 myń Reseı azamaty elimizge kirgen. 120 myńnan astamy shyǵyp ketti. Byltyrǵy jylmen salystyrǵanda, bul kórsetkish eki ese ósip otyr. Biraq 2020-2021 jyldary pandemııaǵa baılanysty shekara jabylǵanyn bilesizder. Al onyń aldyńǵy jyldary – 2018-2019 jyldarmen salystyrǵanda, bul san úsh esege az. Ol jyldary birinshi toqsanda elimizge Reseıden 350-360 myń adam kirip-shyǵyp turdy", - dedi Qojaev májilis otyrysynda.
Qojaev keltirgen statıstıkaǵa súıensek, búginde 170 reseılik jáne jeti ýkraındyq Qazaqstan azamattyǵyn alýǵa ótinish bildirdi. Bul ótken jyldardaǵy kórsetkishpen birdeı.
2019 jyly Reseıden 200-den astam azamat Qazaqstan azamattyǵyn alýǵa ótinish bildirgen.
“Adyrna” ulttyq portaly
