Şäken erkınırek, öjetteu bolyp östı. Ony auyl-aimaq jaqsy körıp, än saldyryp, taqpaq oqytady, ertegı aitqyzady. Jūmysqa beiımdılıgı azdau edı, tek qaida oiyn-sauyq bolsa, sonda jüretın.
Marqūm şeşemız "būzaudy baǧyp kel, bolmasa tezek terıp kele qoiyŋdar" dese, Şäkennıŋ ne ışı, ne basy auyra qalady. Anamyz qattyraq aitsa, "Serektastyŋ" basyna şyǧyp alyp, ekı aiaqty salbyratyp jıberıp jylaidy da otyrady.
– Senıŋ jūrtty qyljaq qylǧanda basyŋ auyrmaidy, al jūmysqa kelgende bas ta, ış te auyra qalatyny qalai? – dep, apam renjitın edı.
Şäken ekeumız teteles östık. Sol sebepten bolar, köp qaljyŋdasa beretınbız. Men soŋǧy kezderde Şäkennıŋ "öner qysyp jylap otyratyn tasy" dep joldastaryna "Serektasty" körsetıp küldıretınmın.
Bızdıŋ äkemızdıŋ Aimanūly Abbas degen därıger aǧasy bolǧan. Būl kısı Baian audanynda asa qadırmendı adam edı. Sol kökemız atyna mınıp alyp, aǧaiyndardy aralap "Halderıŋ qalai, auru-syrqaudan amansyŋdar ma? Bala-şaǧa aman ba?" dep sūrap jüretın.
Keide "Serektastyŋ" basynda jylap otyrǧan Şäkendı körıp, nege jylap otyrǧanyn sūraǧanda apam qatty ūialyp, Şäkenge qolyn sermep, "toqtat" degendei ym jasaidy. Sol kezde Abbas aǧa:
– Jämke, Jämke, oǧan ūryspaŋyz, ūryspaŋyz. Ol tegın jylap otyrǧan joq. Ony öner qysyp jylap otyr", – deitın. Şäken keiın artist bolǧan soŋ auyl ülkenderı "Apyr-ai, Abbas Şäkendı jasynda "öner qysyp jylap otyr" deuşı edı, jaryqtyq bılıp aitqan eken ǧoi" dep taŋdailaryn qaǧatyn.
Äset AQMOLDA
