Taldyqorǵan qalasyndaǵy Nazarbaev Zııatkerlik mektebiniń qabyrǵasynda “Zamandastar jyrlary" jobasy aıasynda «Ónerimdi elime arnaımyn» ádebı-shyǵarmashylyq kesh ótti.
Keshtiń maqsaty - ólkemizdegi halyqtyń ystyq yqylasyna bólenip júrgen qalamgerlerimizdiń shyǵarmalaryn oqýǵa nasıhattaý, olardyń úlgili ómir joldaryn óskeleń urpaqqa ónege tutyp, jastardyń kitap oqýǵa qulshynysyn arttyrý, eline, jerine degen súıispenshilikterin arttyrý. Kesh qonaqtary: QR Mádenıet qaıratkeri, QR Aqparat salasynyń úzdigi – Jumataı Ospanuly, Qazaqstan Jazýshylar odaǵynyń músheleri – Qasen Gúlbaqyt Toqtanqyzy men Jangeldi Nemerebaı, Jýrnalıster jáne Jazýshylar Odaǵynyń múshesi, Halyqaralyq Qazaq PEN klýbynyń múshesi, «Jetisý» telearanasynyń bólim basshysy, «Janr» jetisý ádebı klýbynyń prezıdenti – Esbolat Aıdabosyn, Respýblıkalyq, oblystyq músháıralardyń jeńimpazy, «Kóńil gúli», «Alǵys» atty óleńder jınaǵynyń avtory – Azamat Nurmuhan Saılaýuly, sonymen qatar Taldyqorǵan qalasyndaǵy Nazarbaev Zııatkerlik mektebiniń túlegi, respýblıkalyq «Jas Alash» gazetinde prozalyq shyǵarmalarǵa arnalǵan «Qazaq pen qala» proza baıqaýynyń jeńimpazy – Temirlan Qylyshbek.
Kezdesý barysynda Zııatkerlik oqýshylar men kesh qonaqtary birigip arnaıy tapsyrmalar oryndady: qysqa ýaqyt aralyǵynda shyǵarmashylyq jumys (proza/poezııa) jazdy. «Aqyn óleńderi oqyrman kózimen» aıdary boıynsha oqýshylar qonaqtardyń shyǵarmalarynyń birine aldyn-ala salynǵan sýretterdi, gazet-jýrnal qıyndylarynan jasalynǵan posterlerdi tanystyrdy. Qonaqtar sýret arqyly óziniń qaı shyǵarmasymen baılanysty ekenin anyqtap, sol shyǵarmanyń shyǵý tarıhymen bólisti. Sondaı-aq, aqyn-jazýshylar shyǵarmashylyq laboratorııasy jóninde oqýshylarǵa suhbat berdi.
Óskeleń urpaq ádebıetten alshaqtamasa, ol ulttan alshaqtamaıdy. Ulttan alshaqtamaǵan adam, ol keıin ulttyń qaıratkeri bolady, halyqqa qyzmet etedi. Qazirgi tańda myqty bilgirler bar, biraq óziniń tól mádenıetinen alshaqtap ketken. Sondaı máseleni aldyn alý – búgingi Zııatker mektep uıymdastyryp otyrǵan osyndaı is shara, - dep «Jetisý» telearanasynyń bólim basshysy, «Janr» jetisý ádebı klýbynyń prezıdenti, jazýshy, jýrnalıst Esbolat Aıdabosyn óz pikirimen bólisti.
