Bir paraq qaǵaz úshin 1 mlrd teńge jumsalǵan úı buzylmaq

27.04.2022

3054

Almatyda 1 mlrd teńge jumsalǵan kópqabatty turǵyn úıdiń qurylysy buzylmaq, dep habarlaıdy “Adyrna” ulttyq portaly Baq.kz saıtyna silteme jasap.

2021 jyly «Art Tehnoss» qurylys kompanııasy turǵyn úı keshenin salý úshin Naýryzbaı aýdanyndaǵy «Shuǵyla» shaǵyn aýdanynan 1 ga jer telimin satyp alǵan. Ákimdiktiń ruqsatyn alyp, tehnıkalyq talaptardy belgileıtin qajetti qujattardy jınaǵan qurylys salýshy jobany júzege asyrýǵa kirisedi. Eki aı ishinde jerasty avtoturaqtaryn salyp, gaz ben elektr qýatyn tartqan. Buǵan 1 mıllıard teńgege jýyq qarjy jumsalǵan. Biraq arhıtektýra bólimi sáýlet-josparlaý tapsyrmasyn bermegen jáne bul qurylys zańsyz degen sheshim shyǵarǵan.

Osydan keıin qurylys kompanııasynyń ıesi Muhtar Abıtov bul jobaǵa salǵan aqshasyn qaıtara almaı sotqa júgingen. Alaıda, sot qurylys zańsyz degen sheshim shyǵarǵan. Al ınvestor barlyq talaptardyń zańdy túrde oryndalǵanyna senimdi.

Joba boıynsha aýmaǵy 23 myń sharshy metr bolatyn 12 qabatty eki úı salyný kerek bolǵan. Qazir eki qabattan turatyn jerasty avtoturaǵy men úıdiń eki qabaty salynyp bitken. Qurylys alańyna gaz, elektr qýaty tartylǵan.

2021 jyldyń naýryzynda úıdiń qurylysy bastaldy, jospar boıynsha jeltoqsanda salynyp bitýi kerek bolǵan. Aıyna eki qabattan kóterý kózdeldi, ıaǵnı 12 qabatty úıdi alty aıda salyp bitirýimiz qajet bolǵan. Qurylys eki aı júrdi, keıin toqtatyp tastady. Aldymen Almaty qalasy Qala qurylysyn baqylaý basqarmasynyń adamdary kelip qurylys zańsyz dedi. Qujattarymnyń barlyǵy ornynda, tek Sáýlet-josparlaý tapsyrmasyn (SJT) bermeı jatqanyn aıttym. Sol sebepti olar maǵan aıyppul saldy. Eki ret 291 myń teńgeden tóledim. SJT-ny sáýlet bólimi berý kerek, solar bermeı otyr,-deıdi qurylys kompanııasynyń ıesi M.Abıtov.

Sáýlet basqarmasy qurylysty ruqsatsyz salyp jatyrsyńdar degen ýáj aıtqan. Biraq kompanııa olarǵa 9 ret hat jazyp, mardymdy jaýap ala almaǵandaryn aıtady.

Olarǵa 9 márte hat jazdym. Únemi «motıvırovannyı otkaz» dep jazady. Olar birinshi ret jaýap bergende úıdi ne úshin salýǵa bolmaıtynyn, qandaı kemshiligim baryn naqty kórsetý kerek edi, soǵan qarap men kemshiligimdi túzeıtin edim. Degenmen men barlyǵyn normatıvke saı júrgizip jatyrmyn,-deıdi ol.

Bastapqyda sáýlet basqarmasy qurylys kompanııasyn ekonomıkalyq sotqa bergen. Alaıda sot úı súrilýge jatpaıdy degen sheshim shyǵarady. Keıin komapnııa ıesi ákimshilik sotqa ısk bergen. Olar aldymen SJT alý kerek, sodan keıin eskızdik jumystar júrgizilsin degen sheshim shyǵarady.

2021 qarasha aıynda Almaty qalasynyń jergilikti sýdıalary appelıaııada qarady, ol kezde meniń paıdama sheship berdi. Biraq ol sheshimdi sanaýly kún buryn joǵary sot buzyp, qurylysty zańsyz dep tanydy. Meni bul jaıt tańqaldyryp otyr, óıtkeni jergilikti sottar bul isti eki aıdaı zerttep baryp sheshim shyǵarǵan. Al, bul istiń mán-jaıyn bilmeıtin joǵary sot ony 5 mınýt qarap, zańsyz dep sheshim shyǵarǵanyn túsine almaımyn,-deıdi qurylys kompanııasynyń basshysy.

Joǵary sot buzsyn dep sheshim shyǵarǵan qurylysqa 5 myń kýb beton, myń tonna armatýra ketken eken. Muhtar Abıtov bul osy jerge qyzyqqan adamdardyń istep otyrǵany ma dep kúdiktenedi.

Qazir 1990 jyldardaǵydaı reıderlik tartyp alý qaıta kelip jatqan sııaqty. Prezıdent ınvestorlarǵa jaǵdaı jasańdar, qoldaý kórsetińder dep aıtqanymen atqarýshy organdar kerisinshe jasap otyr, tipten jasaǵanyńdy tartyp alyp qoıyp jatyr. Basqasha qalaı aıtamyn? Gosaktide bul jerge kópqabatty úı salýǵa bolatyny kórsetilgen. Sý tartý, káriz jelisine qosylý, gaz tartý boıynsha tehnıkalyq sharttary da bar. Elektr jelisin tartyp, transfomartor qoıdym, oǵan qosa osy mańdaǵy kóshelerdi jaryqtandyrdym. Qurylysqa qatysty J-5 degen qujatym da bar. Qala ákiminiń orynbasary Muhıt Ázirbaevtyń qabyldaýyna kirgenimde ol kisi qujattarymnyń barlyǵyn kórip, «aǵa, sizde J-5 qujaty bar ma?» dep surady. Bar dep edim, «J-5» bolsa sizde eshqandaı problema bolmaý kerek» dedi. Mundaı talaptardyń barlyǵy oryndalǵanda arhıtektýra bizge SJT-ny mindetti túrde berý kerek. Qasymdaǵy úıde turatyn kórshiler qurylysty salýǵa qarsy emes ekenderin bildiretin hatty da jazyp berdi, olar kerisinshe bul jerde balabaqsha, dárihana salynatyn boldy dep qýanyp otyr. Bul jerde tek SJT ǵana ustap tur, ony nelikten bermeı jatqanyn túsinbedim,-dep nalıdy M.Abıtov.

«Art Tehnoss» qurylys kompanııasy buǵan deıin qalada birneshe qurylys nysandaryn turǵyzǵan. 450 oryndy balabaqsha, mektepter salǵan, biraq ol kezde mundaı másele bolmaǵan, deıdi kompanııa basshysy.

Naýryzbaı aýdany ákimdigine eshqandaı narazylyǵym joq. Olar bizdi ınvestor esebinde tirkedi. Olardan eshqandaı kedergi joq. 2-3 mlrd teńge quıamyn degenimde ákimdik kerisinshe qýandy. Bul úıdi turǵyzýǵa óz aqshamdy salyp otyrmyn. 12 qabatty eki úıden 176 páter qoldanysqa berilý kerek edi, onyń ishinde 5-6 páterin jaǵdaıy nashar, úıi joq jandarǵa bersem dep nıet etip júrgenmin,-deıdi ol.

Qurylys alańynda 55 adam jumys istegen, olarǵa 380-450 myń teńge kóleminde ortasha aılyq tólenip kelipti.

Investorlarǵa atqarýshy organdar tarapynan jasalǵan qysymdar men kedergiler memleketke qarsy jasalǵan qylymys retinde qaralsyn, degen prezıdenttiń sózin alǵa tartqan M.Abıtov «endigi úmitim memleket basshysynda» deıdi.

Qurylysy jartylaı bitken bul nysan nelikten jaramsyz bolyp qaldy jáne sáýlet-josparlaý tapsyrmasyn nege bermedi degen suraq boıynsha Almaty qalasynyń ákimdigine suraý salǵan edik. Aldaǵy ýaqytta onyń jaýabyn da jarııalaımyz.