Şymkent qalasy Qaratau audany äkımdıgınıŋ ūiymdastyruymen «El bırlıgı — memleket tūraqtylyǧynyŋ tıregı» ıs-şarasy öttı. Jiyn 1 mamyr — Qazaqstan halqynyŋ bırlıgı künıne orai «Nūrsät» öner mektebınde ūiymdastyrylyp otyr.
— Ärbır memlekettıŋ tūraqtylyǧy eldık pen bırlıkke negızdeletını anyq. Elımızdıŋ bırlıgı nyǧaiyp, yntymaǧy arta bersın! Bız bügın türlı salada ter tögıp, Qaratau audanynyŋ örkendeuıne üles qosyp jürgen azamattarymyzǧa alǧys bıldırmekpız, - dedı Qaratau audanynyŋ äkımı R. Mülkemanov.Şymkent qalalyq «Ahyska» türık etnomädeni bırlestıgınıŋ müşesı, Alievter otbasylyq ansamblınıŋ jetekşısı Bachak Aliev babasynyŋ Qazaqstanǧa qalai kelgenın baiandap berdı. — Äkem Mahanbet pen anam Pambuh 1944 jyly deportasiia kezınde jer audarylǧan. Sol kezdegı Sairam audany Lenin joly kolhozyna kelgende jergılıktı tūrǧyndar, onyŋ ışınde qazaqtar özderınıŋ qorjyn üilerıne qondyryp, as-suyn bölısken. Men 1948 jyly düniege kelgenmın. 30 jyldan astam qūqyq qorǧau salasynda jūmys ıstedım. Ata-anam közı tırısınde qazaq halqynyŋ qonaqjailyǧyn, bauyrmaldyǧyn ärdaiym aityp otyratyn. Qazaq ūltyna degen qūrmetımız retınde nemerelerımızge Nūrsūltan, Ersūltan, Beksūltan, Şahsūltan dep qazaq esımderın qoidyq,- deidı keiıpkerımız. Saltanatty şara barysynda Qaratau audanynyŋ etnomädeni ortalyq ökılderı, käsıpkerlerı, mädeniet salasynyŋ maitalmandary men şaǧyn audandardaǧy belsendı üi basqaruşylary, tūrǧyndar marapattaldy. Şymkent qalalyq korei etnomädeni ortalyǧynyŋ müşesı, №88 jalpy orta mektebınıŋ mūǧalımı Timur Pak — belsendı jastardyŋ bırı.
— Qazaqstanda önıp-ösıp otyrǧanymdy maqtan tūtamyn. Aǧaiyndy beseumız de qazaq elıne degen qūrmetımız retınde qazaq mektebınde bılım aldyq. Atam Vladimir Pak pen äjem Liubov Soi ärdaiym qazaq ūltynyŋ bauyrmaldyǧyn därıptep öttı, -deidı T. Pak.Saltanatty jiyn «Nūrsät» öner mektebı oquşylarynyŋ konsertıne ūlasty.
