Debat týrnırleriniń jeńimpazdary men júldegerleri qomaqty aqshalaı syılyqtar men bilim grantyn alady. Bıyl Qazaqstannyń 6 joǵary oqý orny 12 pikirsaıysshy túlekke bilim grantyn berdi. Bul týraly bilim jáne ǵylym mınıstrliginiń baspasóz qyzmeti málimdedi, dep habarlaıdy “Adyrna” ulttyq portaly.
Debat týrnıriniń 12 jeńimpazy Qorqyt ata atyndaǵy ýnıversıtet, S.Amanjolov atyndaǵy ShQÝ, H.Dosmuhametov atyndaǵy Atyraý ýnıversıteti, Turan ýnıversıteti, Satbayev University jáne Narhoz ýnıversıtetinde oqýǵa grant aldy. Odan bólek olar týrnırlerge qatysqany úshin gramotalarmen, kýboktarmen jáne 200 myńnan 500 myń teńgege deıin aqshalaı syılyqtarmen marapattalady.
Bilim jáne ǵylym mınıstrligi debatty keńinen nasıhattaý boıynsha belsendi jumys júrgizip keledi. Búgingi tańda elimizde 120 944 adamdy qamtıtyn 6 778 debat klýby bar. Olardyń arasynda oqýshylar da, stýdentter de bar.
"Eki jyl buryn 4 405 mektep jáne stýdenttik klýbta 66 186 pikirsaıysshy bolsa, búginde olardyń sany 120 myńnan asty. Olar syndarly talqylaý ónerin úırenedi, basqa debatshylarmen dostyq jáne syılastyq qarym-qatynas ornatady. Sondaı-aq olar oı-órisin keńeıtip, shyǵarmashylyq belsendiligin arttyrady. Bıyl Balalar jyly aıasynda bes debat týrnıri uıymdastyrylady", - dep túsindirdi mıınıstrliktiń respýblıkalyq qosymsha bilim berý oqý-ádistemelik ortalyǵynyń dırektory Raısa Sher.
Búginde bes debat týrnıriniń ekeýi ótkizilgen. Olarǵa 500-ge jýyq oqýshy men stýdent qatysyp, kámeletke tolmaǵandardy oqytý, tárbıeleý jáne olardyń quqyǵyn qorǵaýdyń mańyzdy máselelerin kóteredi.
“Adyrna” ulttyq portaly
