Jyl basynda akademik Orazaly Säbdennıŋ «Jas alaş» gazetınde Qūryltai ötkızu turaly aitqan ūsynysy Prezidenttıŋ joldauynda qamtylyp, köp ūzamai resmi būqaralyq aqparat qūraldarynda jariia etılgen. Bügın, mıne, sol ūsynys negızınde Q.K.Toqaevtyŋ bastamasymen jalpyūlttyq deŋgeide Ūlttyq Qūryltai degen jaŋa institut düniege keldı. Qazaqstan Respublikasy Prezidentınıŋ janyndaǧy Ūlttyq qūryltai özın özı aqtamaǧan būrynǧy «Ūlttyq qoǧamdyq senım keŋesınıŋ» ornyna kelıp otyr. Bilık pen halyq arasynda syndarly dialogty qalyptastyruǧa baǧyttalǧan būl konsultativtık-keŋesşı qūrylym aldyna ülken mındetter jüktelerı anyq. Alaida ūiymdastyruşylar Ūlttyq qūryltai qūramyna müşelerdı ırıkteude öŋırler ökılderın qamtuǧa basa män berıp, sodan baiqamai köne sürleuge tüsıp ketkenı baiqalady. Aqiqatynda Ūlttyq qūryltai qūramyna kıretın adamdar taǧaiyndalmai, on-lain sailau jolymen ırktelgenı dūrys bolar edı. Sonyŋ saldarynan ūlt üşın maŋyzdy taqyryptardy kötere alatyn adamdar kırmei qalǧan.
Ras, Prezident bekıtken qūramy 117 adamnan tūratyn Ūlttyq qūryltai müşelerınıŋ qatarynda Mūhtar Şahanov, Toqtar Äubäkırov, İliia Jaqanov, Seidahmet Qūttyqadam, Asqar Jūmadıldaev, Ermūrat Bapi, Nūrtai Säbilianov, Qairat Joldybaiūly, Anar Fazyljanova, Azamathan Ämırtai siiaqty ūlttyq memlekettılıktı damytuǧa qatysty igı oi aita alatyn jandar bar eken. Bıraq olar köp emes. Al ūlttyq qūryltai qūru turaly eŋ alǧaş ūsynys tastaǧan akademik Orazaly Säbden esımınıŋ körınbeuı tıptı ökınış tuǧyzdy. «Anyǧyn aityp aǧaiynǧa, turasyn aityp tuǧanǧa jaqpaimyn» deitın, memlekettık tıldıŋ janaşyry Asyly Osman apamyz da joq būl tızımde. Amankeldı Aitaly aǧamyz da körınbeidı.
Qarasaŋyz, ūlttyq qūryltaida kımder joq deisız, käsıpker de, kolledj direktory da, JŞS direktory da, tıptı Nazarbaevtyŋ «būlbūly» atanǧan Ermūhambet Ertısbaevqa deiın jür. «Ūlttyq qoǧamdyq senım keŋesınen» aiyrmaşylyǧy müşelerınıŋ sany men naqtylanǧan qūzıretınde ǧana. Ūlttyŋ ılıp alar onşaqty tūlǧasy bar ekenın aittyq. Al qalǧan qalyŋ «massovka» arasynan olardyŋ dauysy estıle me? Is jüzınde būl bilıktıŋ öz ūiǧarymdaryn «halyqpen dialog» arqyly kölegeilep ötkızıp jıberu üşın jasalǧan institut tärızdı. Tıptı osy qūryltaidyŋ tolyqtai qazaqşa ötetını de ülken kümän bar. Basy men aiaǧy qazaqşa, ortasy orysşa «NÄN-nıŋ alaşūbar jinalysy» bolyp ketpese jarady.
Al bız Ūlttyq Qūryltai eŋ aldymen qazaq halqynyŋ memleketqūrauşy ūlt retındegı märtebesın köteredı, türlı diasporalardy qazaq halqynyŋ töŋıregıne şoǧyrlandyrady, memlekettıŋ damuy men qoǧamnyŋ qalyptasuyna ūlttyq tūrǧydan baǧa beredı dep ümıttengen edık. Endı sol ümıttıŋ özı közımızden būlbūl ūşpasa boldy!
Marat Bäidıldaūly (Toqaşbaev),
Jazuşy-publisist.
