Bıreuge qarap şükır etıp, bıreuge qarap pıkır etu üşın de ötkenge oi, bügınge köz jıberu kerek.
Şükır, qaŋtardaǧy būlǧaqtan es jiyp ülgergendeimız. El Prezidentı der kezınde olqylyqtardyŋ ornyn oŋaltyp, qoǧam qaji bastaǧan tūsta özgerıske daiyn ekendıgın däleldedı. Jüiemızdegı derttı anyqtap, tübı tereŋge ketken mäselelerdıŋ şeşu joldaryn ūsynyp, halyqtyŋ talqysyna şyǧardy. Saiasi bäsekenıŋ aşyq jäne adal boluyna uäde ettı. «Auyl itı ala bolsa da, börı kelgende bırıgedı» degen, osy tūsta özgerısten dämelı jūrt ädıldık ornaitynyna senım bıldırıp, referendumǧa keldı. Jalpy aitqanda, alaŋ küi keşıp otyrǧan qoǧam özgerısterdı baisaldy qabyldai aldy.
«Öspes eldıŋ balasy önbes daudy daulaidy» deuşı edı ǧoi. Pälen jylǧy daudy aityp dauryqpaiyn. Bıraq ūtylǧan jerımız turaly aitu – paryz. Onsyz da jetıstıgımızdı eşkım jelkelep ketpesı anyq. Qasym-Jomart Kemelūly nauryzdaǧy Joldauynda saiasi reformalardyŋ baiypty jäne kölemdı paketın ūsynyp, myqty azamattyq qoǧam qūru qajettıgın basa aitty. Aitpasqa da lajy bolmady, sebebı azamattyq qoǧam ūstyny uaqyt tezıne tötep bere almady. Mūny tüisıner kez keldı dep oilaimyn. Keşegı qaraly qaŋtar künderınde aldaǧannyŋ aldyna tüsıp, jelpıngennıŋ jetegınde ketkender osynyŋ dälelı bolsa kerek.... Sodan bolar elımızde qit etse boldy azamattyq qoǧamdy jeleuletıp, saiasatty qozǧaityndar köbeidı. Pıkır qaişylyǧy tuyndap, sypsyŋ sözge sengış bola bastadyq. Toiymsyzdyq esımızdı alyp, erkımızden aiyrdy. El qamyn jeitın Edıgeler emes, öz qamyn oilaityn ezder qaptady. Şynyŋdy aityp kelseŋ de, şımırkpeitın şeneunıkter paida boldy. Nätijesınde mūnyŋ barlyǧy demokratiiaǧa emes, adamdardyŋ kez kelgen mäselede tym saiasilanyp ketuıne äkelıp soqtyrdy. Piǧyly būzyq bölekter ūrymtal sättı paidalanyp, el ışınde bülık şyǧardy. Bıraq bız tosyn oqiǧalarda bölınbeitın bırlıgımızdı körsettık. Onǧa bölınıp, orǧa jyǧylǧaly tūrǧan qazaq qoǧamyn saqtap qaldyq. Tabanda tynyştyǧymyzdy būzǧan kelımsekterdıŋ qandy qūrsauynan qūtyldyq.
Saiyp kelgende, elımızdegı eŋ ırı, äleuettı «AMANAT» saiasi partiiasy da memlekettık müddege adal ekendıkterın aŋǧartty. Qoǧamdaǧy qiianat pen jemqorlyqtyŋ jolyn bögeitın küş – ädıldık jolyn maqūl kördı. Jaŋa Qazaqstanda jaŋǧyru jolyn taŋdap, özgerısterge mūryndyq boluǧa niet bıldırdı. Qazır de sol taŋdauynan taiqymai «Halyq ünıne qūlaq asatyn memleket» tūjyrymdamasyn ıske asyruǧa atsalysyp, barşaǧa teŋ mümkındık beretın azamattyq qoǧamdy ılgerıletuge küş jūmsap keledı.
Aitpaǧym, memleket pen azamattyq qoǧam qatar damyp, azamattar sanaly türde ortaq maqsatqa jūmyla bılse, eldıŋ ırgesı bekıp, täuelsızdıgı nyǧaiady. Al azamattyq qoǧamnyŋ qalyptasyp, damuy adamdardyŋ tıkelei özderıne bailanysty. Sondyqtan da azamattyq qoǧamǧa qoldau körsetıp, onyŋ äleuetın arttyra tüsuımız kerek. Sonda ǧana elımızdıŋ qūqyqtyq tūrǧyda damuyna yqpal ete alamyz.
Söz soŋynda eger är adam özıne jüktelgen ıstı jauapkerşılıkpen köterıp, eşkım eşkımnıŋ ryzyǧyna qol sūqpai, amanatqa qiianat jasamasa, jemqorlyqtyŋ jıbı üzılıp, qarapaiym halyqty eşkım qūrǧaq sözben aldai da, arbai da almauşy edı… Ärine, būl menıŋ azamattyq ūstanymym ǧana!
Oralbai MERGENBAIŪLY,
«Adyrna» ūlttyq portaly
