Aqtóbeniń brendi ne bolmaq?

729
«Brend» uǵymy taýar men naryqqa qatysty uǵym bolǵanmen, damıı kele bul ulttyq qundylyqtyń aıshyǵyn baıqatatyn rýhanı-ıdeologııalyq tańba retinde de qabyldanyp ketti. Osy oraıda árbir óńir de óz brendin qalyptastyrý arqyly jalpyqazaqstandyq qundylyqty damytady. Saralaı kele brendtiń eki túrli týyndaý jáne qalyptasý joldary bar ekenin ańǵarý kerek. Bireýi burynnan jurtqa, halyqqa tanymal dúnıe kenetten naryqtaǵy úlken tutynysqa, bolmasa ıdeologııalyq tutqaǵa aınalady. Al ekinshi jol – jolaıy, arnaıy túrde damyta kele brend retinde aıshyqtaý arqyly jurttyń kózaıymyna aınaldyrý.
Aıtalyq, Aqtóbe oblysy úshin brendke aınalar taqyryp negizinen batyrlyq taqyryby. Árıne bul taqyryp qazaqtyń qaı óńirine de tán. Alaıda, Aqtóbe aýmaǵy keshegi ańyzǵa aınalyp ótken Tomırıstiń (shyn esimi – Tamar, tamshy sózine qatysty) batyr anamyzdyń at sabyltqan jeri. Degenmen, tarıhtaǵy Qyrymnyń qyryq batyry týraly jyr da, olardyń beıiti de osy óńirde. Buǵan qosa ulttyq qundylyqqa aınalǵan Qobylandy batyr jyrynyń bas keıipkeri de, erdiń sońy Eset te Aqtóbede emes pe?!Batyrlyq ınstıtýtynan ajyratýǵa bolmaıtyn jáne Nurpeıispen bitetin jyraýlyq pen jyrshylyq ta bar.

Bul óńir ejelgi saq-sarmat óńiri, oǵyzdar sińgen jer. Mássaǵat taıpasy jaılaǵan meken.Tamyryn tereńge jibergen osy aıǵaqtardyń búgingi atrıbýty aqtóbelik brend bolýǵa tıis jáne solaı qalyptastýry búgingi urpaqtyń tikeleı mindeti.  

Naqtyraq aıtsaq, ónerde jyrshylyqty dáripteý kerek; bul- bir brend; sportta - at sporty, ásirese, kókpar men jamby atý, sadaq atý syqyldy oıyndar oshaǵy bolýǵa Aqtóbe laıyq meken. Toǵyzqumalaq sporty bul óńirde erekshe damyp keledi, endeshe bestem, toǵyzat (toǵyzqumalaqtyń ejelgi ataýy) zııatker sport túrleri odan ári aıryqsha nazarda bolýy qajet. Mereke saıyn, demalys  saıyn bul sport túrleri kópshilikke kózaıym bolýdan tanbaǵany jón.
Budan basqa sovet ókimeti tusynda «Muǵaljar» atty asyltuqymdy jylqy ósirildi, kázir de bar. Bul asyl tuqymdy jylqy da álgi brendti tutastyra túsedi. Baılar bul tuqymdy jarysa satyp alýy qajet, bul at báıgede, kókparda tutynysqa kóbirek túsýi kerek. Jylqyny dáripteı túsetin taǵy týyndy - jazýshy Ǵalym Ahmedovtyń «Jem boıynda» romanynda «qymyzmuryndyq» merekesi týraly beker bir taraý berilmegen. Tipti, búginde oryssha burmalanyp ketken «Jılıanka»ataýynyń álimniń bir balasy Jolan shaldyń otyrǵan qonysy ekeni jáne onyń adam men aıýanǵa úıirin bermegen áıgili Ardala aıǵyry týraly ańyzy da beker emes.

Alaıda, bul brendterge qatysty óndiris oshaqtary men ónerkásipter paıda bolsa ábden durys bolady. Brend qurǵaq nasıhatpen ornyqpaıdy: materıaldyq jáne rýhanı mápeniń nátıjesinde qalyptasady.

Serik Erǵalı,

Erqosaı Ábilov

Pikirler
Redakııa tańdaýy