QR Syrtqy ıster ministrılıgı Qaraqalpaqstandaǧy jaǧdaiǧa qatysty mälımdeme jasady, dep jazady "Adyrna" ūlttyq portaly.
«Özbekstan – Qazaqstan üşın bauyrlas memleket, senımdı odaqtas jäne strategiialyq serıktes. Sondyqtan Qazaqstanda soŋǧy künderı Özbekstan Respublikasynda oryn alǧan oqiǧalardy alaŋdauşylyqpen qabyldady. Özbekstan basşylyǧynyŋ Qaraqalpaqstan Respublikasyndaǧy jaǧdaidy tūraqtandyru boiynşa şeşımderın qūptaimyz ärı qoldaimyz. Bauyrlas Özbekstanda asa maŋyzdy saiasi oqiǧa – Konstitusiiaǧa tüzetuler jönındegı referendum qarsaŋynda – beibıtşılık pen tynyştyq ornyǧatynyna senımdımız. Qazaqstan Özbekstamen 1998 jylǧy 31 qazandaǧy Mäŋgılık dostyq turaly Şart, 2013 jylǧy 14 mausymdaǧy Strategiialyq ärıptestık turaly Şart jäne 2021 jylǧy 6 jeltoqsandaǧy Odaqtastyq qatynastar turaly deklarasiia ruhyndaǧy köpsalaly yntymaqtastyqty damytu men nyǧaitu baǧytyna bekem», - delıngen resmi mälımdemede.
"Adyrna" ūlttyq portaly
