Qaraǧandy Qoǧamdyq keŋesın «jaulap alǧan» şeneunık - belsendıler Toqaevqa ündeu tastady (VİDEO)

Qaraǧandy Qoǧamdyq keŋesın «jaulap alǧan» Mäslihat hatşysynyŋ zaŋsyz äreketterı eş toqtar emes. Būl jäitqa qatysty Qaraǧandy oblysynyŋ belsendılerı öz narazylyqtaryn bıldırıp, el prezidentı Qasym-Jomart Toqaevqa ündeu tastady, dep habarlaidy Adyrna.kz ūlttyq portalynyŋ tılşısı.

BÄRI NEDEN BASTALDY?

2022 jylǧy 2 nauryzda Qaraǧandy qalalyq qoǧamdyq keŋesınıŋ üşınşı qūramy bekıtılıp, keŋes müşelıgıne 30 adam ötedı. Qalǧan 5 adam rezervte qalady. Alaida Qoǧamdyq keŋes öz jūmysyn bastamai jatyp, demokratiia jäne taŋdau erkındıgı tūrǧysynan bırqatar zaŋbūzuşylyqqa jol beredı.

Qaraǧandy qalalyq mäslihat hatşysy jäne apparat basşysynyŋ qatysuymen ötken otyrysta 3-şı şaqyrylym müşelerıne eşqandai sailau jäne dauys beru räsımınsız aldyn-ala bekıtılgen Qoǧamdyq keŋes töraǧasy men onyŋ orynbasarynyŋ, sondai-aq Tūraqty komissiia müşelerınıŋ, onyŋ töraǧasy men orynbasarynyŋ (mūndai lauazym zaŋnamada közdelmegen) aty-jönderı jazylǧan otyrys materialyn taratady. Qalalyq mäslihat Qoǧamdyq keŋestıŋ jekelegen äleuettı müşelerımen aldyn ala äŋgıme jürgızgendıkten, keŋestıŋ köptegen müşelerı būl ädıletsızdıkten «habardar» bolyp şyǧady.

Qoǧam belsendılerınıŋ mälımdeuınşe, bırınşı otyrysta "Qoǧamdyq keŋester turaly" QR Zaŋynyŋ 13-babynyŋ 1-tarmaǧy būzyldy. Joǧaryda jazylǧandardyŋ dälelı retınde bükıl otyrys barysynda audio-beine-fiksasiia jürgızıldı.  

MÄSLİHAT HATŞYSYNYŊ «ARAM OIY» ISKE ASPADY

Jaŋadan qūrylǧan Qoǧamdyq keŋes Töraǧalyǧyna öz adamyn daiyndaǧan Qaraǧandy qalalyq Mäslihat hatşysy Qūdaibergen Beksūltanūlynyŋ aram oiy ıske aspai qalady.

Keŋes müşesı Nailia Kairbekova aldyn-ala bekıtılıp qoiǧan Bocharov pen bırge Qoǧamdyq keŋes töraǧalyǧyna taǧy bır kandidat retınde Sūltan Medeubaevty ūsynady. Ekı ret dauysqa salynsada Sūltan Medeubaev Qoǧamdyq keŋestıŋ qoldauyn tabady. Osylaişa halyq ışınen şyqqan janaşyr azamat sailauda jeŋıske jetıp, Qaraǧandy qalalyq Qoǧamdyq keŋes Töraǧasy bolyp sailanady.

Qoǧam belsendısı Amanjol Orazalinovtyŋ aituynşa, mäslihattan mūndai şeşımdı kütpegen Qaraǧandy qalasynyŋ äkımı būl «jäisız» jaŋalyqty esti sala ornynan tūryp, ketıp qalady. Būl aldyn-ala josparlaǧan maqsatynyŋ kül-talqany şyqqan Qūdaibergen Beksūltanūlynyŋ namysyna tiedı. Osylaişa jasy 66-dan asqan gerontokrat ömırınde bırınşı ret jeke özınıŋ aitqan adamyn qoia almai qalyp, sailauda ädıl jeŋgen Sūltannan öş aluǧa kırısedı.

 

«30 JYL ŞEŞILMEGEN MÄSELELERDI 3 AIDA ŞEŞKEN KEŊES TÖRAǦASYN QUYP TYŊADY»

Qaraǧandyda 30 jyl boiy qordalanǧan mäselelerdı şeşuge bel buǧan Sūltan Medeubaev Qoǧamdyq keŋes töraǧalyǧyna bel şeşıp kırısıp, qasyna jalyndap tūrǧan jastardy jinap, az uaqyt ışınde auyz toltyryp aitarlyqtai nätije körsete bastaidy. Qala boiynşa bırqatar kürdelı mäselelerdıŋ şeşıluıne yqpal etıp, halyqtyŋ alǧys batasyna bölenedı. Deputattardyŋ tısı batpaǧan ädıletsızdıkpen küresıp, Mäslihat hatşysy Beksūltanovqa odan ärı ūnamaidy. Ol qalai da bolsyn «ädıl töraǧadan» tez qūtyludyŋ amaldaryn qarastyrady.

«Prezidium müşelerenıŋ bärı öz adamdary bolǧandyqtan  Beksūltanov «postanova» jasaidy da, aldyn-ala daiyndalyp qoiǧan hatpen Qoǧamdyq keŋestıŋ bır müşesı şyǧyp «Medeubaev öz jūmysyn oryndai almai jatyr, maǧan onyŋ ıstep jatqany ūnamaidy» dep Qūdaibergen Beksūltanūlynyŋ äzırlep bergen programmasymen būlar Medeubaevqa qarsy dauys beredı de, Sūltan Medeubaevty 3 aidan keiın töraǧalyqtan alǧyzyp tastaidy. Qoǧamdyq keŋes töraǧasynyŋ mındetın atqaruşy retınde onyŋ ornyna özı 66-dan asqan aqsaqal jasy 70-ke kelgen aqsaqal, būrynǧy deputat Jändıl Mūhtarovty qoiady», - deidı Marat Qanatūly.

Osylaişa, töraǧa tızgının ūstaǧanyna tura 3 ai tolǧanda Medeubaev kezektı otyrysta keŋestıŋ jekelegen müşelerınıŋ auyzşa aryzy boiynşa qarapaiym dauys beru arqyly eş däleldı sebeptersız qyzmetınen «alynyp tastaldy».

Qoǧam belsendılerınıŋ habarlauynşa, sol otyrysta ony jabyq dep jariialau turaly şeşım qabyldandy ("Qoǧamdyq keŋester turaly" QR Zaŋynyŋ 13-babynyŋ 3-tarmaǧy) jäne sol kezde rezerv tızımınde tūrǧan adamdardy ("Qoǧamdyq keŋester turaly" QR Zaŋynyŋ 9-babynyŋ 9-tarmaǧyn jäne 15 babynyŋ 3-tarmaǧyn būza otyryp, Qoǧamdyq keŋestegı bos oryndarǧa ümıtker retınde jıbermeu turaly şeşım şyǧardy. Būl şeşım de eşqandai da talqylausyz, eş tüsındırusız, negızsız qabyldandy.

«ÖZDERINE KEREK ADAMDARDY KIRGIZE BASTAIDY»

«Dauys beru arqyly rezervte tūrǧan azamattardyŋ bärın alyp tastaidy da, kandidattardan qaitadan qūjat jinaidy. Onyŋ ışınde özınıŋ azamattyq pozisiiasy, jeke közqarasy qalyptasqan BAQ ökılderı, halyqqa şyn qyzmet etuge laiyq blogerler men jurnalister Qoǧamdyq keŋeske ötpei qalady. Iаǧni olar özderıne kerek emes adamdardy kırgızbei, özderıne ūnaityn «loialnyi» adamdardy kırgızedı. Sol kezde Nailia Kamalovna bastaǧan bırqatar keŋes müşelerı ädıletsızdıkke şydamai Qoǧamdyq keŋesten şyǧyp ketedı», - deidı Marat Qanatūly.

Qoǧam belsendılerınıŋ habarlauynşa, Keŋestegı bos oryndarǧa qosymşa sailau taǧaiyndalyp, onyŋ qorytyndysy boiynşa Qoǧamdyq keŋeske bes jaŋa müşe kıredı. Aita ketu kerek, keŋeste bırde-bır BAQ ökılı joq, ötınış bergen jurnalist, blogerlerdıŋ kandidaturasy qabyldanbady. Keŋes töraǧasynyŋ mındetın atqaruşyny "taǧaiyndau" da tez jäne Prezidium qūramynan tys jürgızıldı.

Osylaişa Amanjol Orazalinov, Marat Qanatūly bastaǧan bırqatar Qaraǧandy oblysynyŋ belsendılerı jergılıktı Mäslihat tarapynan «Qoǧamdyq keŋester turaly» QR Zaŋynyŋ bırqatar normalary būzylǧanyna köz jetkızıp, qalalyq Mäslihat hatşysy Qūdaibergen Beksūltanūlynyŋ zaŋsyz äreketterın äşkerelep, öz narazylyqtaryn qala äkımı – Ermaǧanbet Bölekpaevqa, oblys äkımı – Jeŋıs Qasymbekke,  tıptı Parlament Mäjılısınıŋ töraǧasy – Erlan Qoşanovqa jetkızgen. Alaida eş nätije joq. Olar «tübı ädılettılık ornatamyz» dep QR Prezidentı Qasym-Jomart Toqaevqa ündeu tastap, būl ıstı soŋyna deiın jetkızuge niettı. Amanjol ORAZALİNOV, Qaraǧandy oblystyq qoǧamdyq keŋes müşesı:

«Osyǧan deiın Ministrlıkke de, jergılıktı aimaqtyq äkımşılıkke de būl narazylyǧymyzdy bıldırdık. Bıraq ta eşqandai nätije bolǧan joq. Qūrmettı Qasym-Jomart Kemelūly! Sızdıŋ özıŋızge tıkelei şyǧuǧa mäjbür bolyp otyrmyz. Osy Qaŋtar oqiǧasynan keiıngı bastau alǧan reformalardy halyq 30 jyl tosty dep aitsaq artyq bolmas. Sol reformalardyŋ eŋ basty, eŋ özektı mäselesı - jergılıktı özın-özı bileu organdaryn damytu jäne soǧan jan-jaqty halyq arasynan kandidattardyŋ şyǧuyn halyq talap etedı. Qaŋtar oqiǧasynan keiın jaŋa «Qoǧamdyq keŋester» qūryldy. Sonyŋ qataryna közınde oty, jüregınde jalyny bar bırqatar jas buyn, belsendıler kırdı. 3 aidyŋ ışınde bıraz jūmystardy ıstep ülgerdı. Būl jerde eŋ bır qiyn mäsele bolyp tūrǧany... Basynda qaǧazda sailanǧan özderınıŋ basşylaryn sailamai, sol jastardyŋ ışınen şyqqan bauyrymyzdy sailauǧa könbegen. Sol 30 jyl özınıŋ aitqanyn ıstep «Qoǧamdyq keŋesterdı» bolsyn, "Mäslihattardy" bolsyn  osylai özınıŋ adamdarymen tolyqtyrǧan «aǧalarymyz» kedergı jasap, tübınde eşqandai Zaŋǧa säikes kelmeitın dauys berıp, sol bauyrymyzdy «Qoǧamdyq keŋes» basşylyǧynan aldy. Būl jerde bızdıŋ narazylyǧymyz bır adamnyŋ basşylyqtan ketkenınde emes...

Olar jalpy Qazaqstan halqynyŋ jaŋa reformalarǧa degen talpynysyna balta şauyp otyr...

30 jyl degen ülken uaqyt. Sol 30 jylda qanşama özgerıster jasauǧa bolatyn organdardyŋ jūmys ıstemeuın 3 aida sol jastarymyzdyŋ körsetkenı ärine olarǧa jaqpady. Qūrmettı Qasym-Jomart Kemelūly! Sızdıŋ bastap jatqan reformalaryŋyz osy Astananyŋ törınen aspai jatyr. Naqtyraq aitsaq, myna jergılıktı aimaqtarda «kniazdardan» aspai jatyr. Qoǧamdyq keŋesterdı halyqtan şyqqan kandidattarmen tolyqtyru qajet. Būl jasalyp jatqan ıs qoǧamda narazylyq tudyrady dep sanaimyz. Sebebı naqty qoǧamnyŋ oiyn bılmei, aşyqtyqqa balta şauyp, öz oiyna kelgen özıne ūnaǧan kandidattardy kırgızıp jatqanyn bız körıp otyrmyz. Osy sebepten bız özımızdıŋ narazylyǧymyzdy bıldıremız. Būl tolyǧymen Zaŋǧa qaişy! Osyndai mäseleler şeşılmese, bastalǧan reformalar eşqandai nätije bermeidı. 30 jylda oǧan bızdıŋ közımız jettı. Qazır bız osy jerden toqtap qalsaq, keiın būl ülken mäselege ainalady. Qaraǧandy qalasynyŋ, Qaraǧandy oblysynyŋ barşa qoǧam belsendılerı özınıŋ narazylyǧyn aitqysy kelıp otyr. Bızdıŋ talaptarymyzdyŋ şeşıluın sūraimyz jäne osyǧan jauap retınde osy äreketke barǧan sol kısıler öz oryndaryn bosatyp, şyn mänınde halyqtyŋ arasynan şyqqan azamattardyŋ Qoǧamdyq keŋesterge kıruın talap etemız!

Marat QANATŪLY, Qaraǧandy oblystyq qoǧamdyq keŋes müşesı:

Qūrmettı prezident Qasym-Jomart Kemelūly! «Jaŋa Qazaqstan» degennen keiın jaŋa özgerıster boluy kerek! Özgerıster bolyp jatyr. Bıraq joǧary jaqta elordada ǧana bolyp jatyr. Bergı jaqta bızderde özgerıs joq. Zeinet jasynan asyp ketse de bilıkke jabysyp jastarǧa kedergı jasauda. Jastary 65-ten asady. Ötken joly Parlament spikerı Erlan Jaqanūly kelgen kezde bız tolyqtai oblys äkımınıŋ aldynda osy jaǧdaidy kötergenbız. Deputattyqqa da bır emes ekı ret sailauǧa tüstık. Bız ekı sailaudyŋ da ışıne kıre almadyq. Bükıl deputattardyŋ artynan bır ǧana «Mäslihat hatşysy» jügırıp jür. Qalǧany körınbeidı, tasada qalyp qoiyp jatyr. Öz oilaryn aşyq aita almaidy, jetkıze almaidy. Myna «Qoǧamdyq keŋestede» tura solai. Taza aşyq sailau jolymen sailanǧan jas azamatty 3 aidan keiın eşqandai dälelsız ornynan alyp tastaǧany bärımızge auyr tidı. Rasyn aitsaq, sızdıŋ joǧarydan ıstep jatqan ısterıŋızdı kemşılık qylyp körsettı. Osyndai ıster ziian jasap otyr. Ol jıgıttı alyp tastap, ornyna mındet atqaruǧa 4-5 ret sailauǧa tüsken, bırneşe ret deputat bolǧan 70-ke jasy kelıp qalǧan adamdy qoidy. Bız sızden osyndai jasy kelgen azamattardy bilıkke jäne mūndai sailau ısterıne aralastyrmauyŋyzdy ötınıp sūraimyz!

https://www.youtube.com/watch?v=ylgXFCJdemY Qoǧam belsendılerı osy künge deiın közboiaumen ainalysqan Qoǧamdyq keŋesterdıŋ "halyqqa" ötkenın qalaidy. Olardyŋ aituynşa, Qaŋtar oqiǧasynyŋ nätijesı retınde Qoǧamdyq keŋesterge tek "halyqtyŋ ökılderı" kıruı kerek.

"Öitkenı, Qoǧamdyq keŋeste qalanyŋ ary qarai damu strategiiasy, biudjet jobasy, ışkı granttar, äkımnıŋ granttary talqylanady. "Nege anaǧan berıp jatyr, nege mynaǧan berılıp jatyr" degen siiaqty sūraqtar qoiylady. Sondyqtan olar tek öz adamdaryn jinaidy. 30 jyl boiy özıne kerek adamdardy ūstady. "Zeinetkerlerdı nege zeinetke jıbermeisızder? Jastarǧa qiianat jasap jatyr,  keşe Sūltan bauyrymyzdy alyp tastady" dep Qaraǧandyǧa kezdesuge kelgen Qoşanovqa da būl mäselenı aittyq. Eş özgerıs joq. Nege Qoǧamdyq keŋes halyqtyŋ müddesı üşın emes şeneunıkterdıŋ müddelerı üşın taŋdaluy tiıs? Bırınşı jäne ekınşı ret ötkızılgen sailau da bıraz azamattardyŋ narazylyǧyn tudyrǧan bolatyn. Bıraq, qalanyŋ atqaruşy bilık ökılderı tarapynan da, Qoǧamdyq keŋestıŋ özınen de eş özgerıstı baiqap otyrǧanymyz joq.

"QK būrynǧy töraǧasy qalyptasqan jaǧdai boiynşa QR AQDM Azamattyq qoǧam ısterı komitetınıŋ töraǧasynan jazbaşa jauap aldy. Būl hatta QK keŋesı men Prezidium müşelerınıŋ zaŋsyzdyǧyn rastaityn barlyq ıs-äreketterı boiynşa naqty tüsındırmeler berılgen. Zaŋnamany būza otyryp qalyptasqan jäne aşyqtyq pen ädıldık qaǧidattaryna süienbeitın Qaraǧandy Qoǧamdyq keŋesı taratylyp, BAQ ökılderı men täuelsız sarapşylardy, sondai-aq qoǧam qairatkerlerın tarta otyryp, jaŋa Qoǧamdyq keŋes qūryluy tiıs dep sanaimyz. Qaraǧandy qalasynyŋ belsendı azamattary Sızden joǧaryda baiandalǧan zaŋnamanyŋ būzyluyna jäne olardyŋ saldaryn joiuǧa bailanysty Memlekettık basqarudyŋ tiıstı jergılıktı organdarynyŋ tūlǧalaryna qatysty şaralar qabyldaudy sūraidy", - dep qoǧam belsendılerı kürmeuı qiyn, şeşuın tappai tūrǧan mäselenı tek prezident şeşe alady dep Toqaevtan qoldau kütude...

"Adyrna" ūlttyq portaly