UQK Sırııadaǵy soǵysta qansha Qazaqstan azamatynyń qaza tapqany týraly derekpen bólisti.

4430
Adyrna.kz Telegram
Ulttyq qaýipsizdik komıtetiniń (UQK) Azattyq agenttigine bergen resmı jaýabyndaǵy derek boıynsha, Sırııa men Irakta soǵys bastalǵaly Taıaý Shyǵysqa 8OO -ge jýyq Qazaqstan azamaty ketken. Olardyń kóbi – balalar.

- Shildedegi jaǵdaı boıynsha, Sırııa men Iraktaǵy halyqaralyq terrorıstik uıymdarda qazaqstandyq 120 er adam, 250-den astam áıel jáne 500 kámeletke tolmaǵan bala bar, - dep jazylǵan UQK jaýabynda.

QANShA QAZAQSTANDYQ ELINE ORALDY?

Astana Irak pen Sırııadaǵy soǵysta barlyǵy qansha qazaqstandyqtyń qaza tapqanyn bilmeıdi. Ulttyq qaýipsizdik komıtetinde tek Sırııadaǵy halyqaralyq terrorıstik uıymdar jaǵynda soǵysqan 260-tan astam qazaqstandyqtyń qaza bolǵany týraly málimet bar.

UQK deregi boıynsha, qarýly qaqtyǵysqa zańsyz qatysqany úshin Sırııada 60-qa jýyq, Irakta shamamen 20 Qazaqstan azamaty qamaýda otyr.

Astana qazir quqyq qorǵaý jáne memlekettik organdarmen birigip, urys aımaqtaryna ketken qazaqstandyqtardy elge qaıtarý úshin jumys istep jatqanyn habarlady.

UQK dereginshe, Sırııadaǵy áskerı qaqtyǵys bastalǵaly 112 qazaqstandyq (61 er jáne 51 áıel) elge qaıtarylǵan. Al budan bólek halyqaralyq terrorıstik uıymdardyń lagerleri men bazalarynan Qazaqstanǵa qaıtaryldy delingen balalardyń sany - 81.

Daily Mail basylymy jarııalaǵan "Sırııadaǵy jıhadshy qazaq balalar" týraly IM vıdeosynyń skrınshoty.

Al bıyl naýryzda UQK tóraǵasynyń orynbasary Nurǵalı Bilisbekov Astanadaǵy jýrnalısterge arnalǵan jıynda Sırııadan 125 qazaqstandyqtyń oralǵanyn, 57 adam qamaýda otyrǵanyn, qalǵandarynyń baqylaýda ekenin aıtqan.

UQK soǵys aımaqtarynan qaıtyp kelgen adamdardy ońaltý sharalaryn júzege asyryp jatqanyn da málimdedi. Bul sharalar úshin Qazaqstanda ońaltý ortalyqtary ashylǵan.

Qazaqstan azamattarynyń Sırııa men Irakqa ketkeni týraly alǵash ret 2013 jyly aıtyla bastaǵan. Osy jyly kúzde Irak pen Sırııadaǵy qarýly janjalǵa ıslamshyl radıkaldar jaǵynda qatysýǵa Qazaqstannan barǵan "150 jıhadshy" týraly vıdeo taraǵan edi.

Keıin Taıaý Shyǵystaǵy soǵys aımaǵynda júrip qaza tapqan qazaqstandyqtar týraly aqparat da jıilegen. Olardyń keıbiriniń artynda bala-shaǵasy qalǵan. Qazaqstannan Sırııa men Irakqa ketken balalaryn qaıtarý maqsatymen ata-analar komıteti de qurylǵan. Keı ata-ana tipti Sırııaǵa balasyn izdep barǵanymen, olardy elge qaıtýǵa kóndire almaı oralǵan.

Bir jyl buryn, ıaǵnı 2017 jyldyń shildesinde Túrkııanyń Ishki ister mınıstrligi «Kitap» dep atalatyn baıandama jarııalap, 1941 Qazaqstan azamatynyń Túrkııa arqyly Sırııaǵa ótpek bolǵanyn habarlaǵan. Stambýl jarııalaǵan baıandamada Qazaqstan azamattary qaqtyǵys aımaǵyna kirýge jıi talpynatyn 10 el qatarynda atalǵan.

Ótken jyly qarashada Qazaqstan Syrtqy ister mınıstrligi Qazaqstannyń Oral qalasynyń turǵyny - 1988 jyly týǵan áıel men onyń tórt balasy Sırııadaǵy soǵys aımaǵynan Sheshenstan astanasy Groznyıǵa arnaıy reıspen bir top adammen birge jetkizilgeni týraly habarlaǵan.

Qazaqstan 2015 jyly kúzde DAISh uıymyn "terrorıstik top" dep tanyǵan.

ULTKZ

Pikirler