"Qyz Jıbektei" kino qaida?

«Qyz Jıbek» filmın körmegen qazaq joq şyǧar. Qai filmnıŋ bolmasyn körermenge berer tärbiesı, jetkızgısı keletın oiy bolady. Al «Qyz Jıbek» filmınıŋ jas ūrpaqqa bererı – ūşan-teŋız.  Qazaq halqynyŋ körnektı jazuşysy Ǧabit Müsırepovtıŋ körkemsöz önerımen saptalǧan būl filmnıŋ körermenge jol tartqanyna da 47 jyl toldy. Sūltan Qojyqovtyŋ rejisserlıgımen qūrylǧan film jaryq köre salysymen körermennıŋ közaiymyna ainalyp ülgergen edı. Ataqty rejisser Satybaldy Narymbetov: «Qyz Jıbek» – teatrlandyrylǧan film. Öte jaqsy dünie» dep filmge öz baǧasyn berıp, därıptegen. Filmde appaq aqqudai sūlu da kerbez Jıbek pen erjürek Tölegennıŋ mūŋǧa toly taǧdyry jaily baiandalǧany qalyŋ köpşılıkke mälım. Baiyrǧy qazaq daularynyŋ saldarynan qos ǧaşyqtyŋ mahabbat hikaiasy qysqa bolady. Jıbektıŋ baqytsyz küi keşuınıŋ sebebı – ekı jaq arasyndaǧy ru mäselesı. Film soŋy Qyz Jıbektıŋ  arylmas qaiǧysymen jäne  qanıpezer Bekejan   opasyzdyqpen öltırgen Tölegennıŋ auyr qazasymen aiaqtalady. Qos aqqudyŋ qaiǧymen örılgen taǧdyry kımnıŋ bolmasyn jüregıne batatyny sözsız. «Qyz Jıbek» kinosy – ertedegı qazaq dästürlerınıŋ bırtūtas jiyntyǧy. Jarty ǧasyrǧa juyq tarihy bar filmde ejelgı qazaq dästürlerı körınıs tapqan.  San ǧasyrdyŋ qoinauynda şaŋ baspaǧan asyldai qūndy salt-dästürler osy filmde ūşyrasqan. Mysaly, oqty ortasynan bölu, jekpe-jek bügıngınıŋ qazaǧyna taŋsyq närse. Qazırgı taŋǧa deiın maŋyzdylyǧyn joǧaltpaǧan betaşar da, aitys ta basqaşa ülgıde körsetılgen. Maǧan osynyŋ bärı ülken oi salady. Ötkennıŋ enşısınde qalyp qoiǧan salt-dästürlerımızdı qazırgı auqymdy joba «Ruhani jaŋǧyru» baǧdarlamasyna engızıp, bız tereŋınen tanysa otyryp, būl dästürlerımızdı öskeleŋ ūrpaqqa mūra retınde qaldyra alamyz. Būl – öz dästürlerımızdıŋ tarih betterınde öşpestei qalatyndyǧynyŋ kepılı. Jıbek – qazaq kinosy tarihyndaǧy qaitalanbas sūlulyqtyŋ iesı. Qazaq qyzynyŋ boiyndaǧy qasietterdıŋ bärı Jıbek boiynda şoǧyrlanǧan. Ol – jarqyraǧan jūldyzdai sūlu, qyz bolsa da batyl, öz sözıne berık, tärbielı, sabyrly boijetken. Onyŋ osy filmde jasap şyǧarǧan kelbetın qazırgı      arularymyzdan baiqauǧa bolady. Qyz Jıbektıŋ jolymen jürgen apa-äpkelerımız bügınde ülgılı äpke, aiauly jar, qamqor ana. Jıbektıŋ filmdegı obrazy qazaqtyŋ köptegen būrymdy qyzdaryna ǧibrat bola bıldı. Tölegen – tektı, symbatty, namysşyl beine. Men ony öz zamanynyŋ naǧyz sūltany dep sanaimyn. Öne boiy tūnǧan küş pen jıger. Elı men jerı üşın, mahabbaty üşın şynaiy berıspei kürese bılgen ör ruhty azamat. Tölegennıŋ adaldyǧy, şynaiylyǧy – özgege önege.   Keşegı kün – bügıngı tarih. «Qyz Jıbek» – qanşa jyl būryn taspalanǧan bolsa da, älı künge deiın qaitalap körgıŋ kelıp tūratyn märtebesı asqaq film. Ssenarii avtory, kösemsözşı Ǧabit Müsırepov keiıngı ūrpaqqa oi salarlyqtai, tälım-tärbie bere alatyndai tuyndy ūsyndy. Synşy Ämina Qūrmanǧaliqyzy «qazaqy sūlulyqtyŋ gauhary» dep surettegen Jıbek pen sūŋqardai Tölegennıŋ mahabbat jyry mäŋgılıkke halyq jadynda būlbūldai sairap qala bermek.

Şalqarova Aidana Erbolqyzy,

                                                                             Qyzylorda qalasyndaǧy №145 orta mekteptıŋ 11-synyp oquşysy