Palata spikerı Erlan Qoşanov bastaǧan Mäjılıs delegasiiasy Qaraǧandy oblysynyŋ Nūra jäne Osakarov audandaryna bardy. Mäjılıs deputattary öŋırdegı investisiialyq jobalardyŋ jüzege asyrylu barysymen jäne äleumettık nysandardyŋ jaǧdaiymen tanysty.
Nūra audanynda deputattar Bolat Äbdıkärımov atyndaǧy köpsalaly kolledjge bardy. Oqu orny agroönerkäsıp, qūrylys jäne öndırıs salalaryna arnalǧan on mamandyq boiynşa kadrlar daiarlaidy. Bügınde mūnda şamamen 300 student bılım aluda.
Mäjılıs töraǧasy pedagogterge arnaǧan sözınde Eŋbek adamynyŋ rölı memleket üşın maŋyzdy ekenın atap öttı. Ol qazırgı taŋda Qazaqstanda jūmysşy mamandyqtary boiynşa mamandarǧa sūranys 40 paiyzdan asyp otyrǧanyn aityp, osyǧan bailanysty jas, bılıktı kadrlar daiarlauǧa erekşe nazar audaru qajettıgıne toqtaldy.
– Özderıŋızge belgılı, Prezidentımız biylǧy jyldy Jūmysşy mamandyqtar jyly dep jariialady. Būl baǧytta kolledjder men uchilişeler elge qajettı mamandar daiarlau ısınde erekşe röl atqarady. Sızder jas dänekerleuşılerge, qūrylysşylar men tıgınşılerge eŋbekke degen şynaiy qūrmettı, öz mamandyǧyna degen süiıspenşılıktı jäne dūrys moraldyq qūndylyqtardy darytyp kelesızder. Myqty ekonomika men eldıŋ jarqyn bolaşaǧy ūstazdardyŋ qolynda. Sondyqtan memleket sızderdı tolyq qoldaidy. Kolledjderdı damytuǧa jäne mūǧalımderdıŋ eŋbek jaǧdaiyn jaqsartuǧa bar küşın salady, – dedı Erlan Qoşanov.
Sonymen qatar ol eŋbek adamyn qoldauǧa baǧyttalǧan naqty özgerısterge, iaǧni, jūmysşy mamandyq ielerı üşın jaŋadan tūrǧyn üi ipotekalyq baǧdarlamasynyŋ ıske qosylǧanyn, sondai-aq ziiandy eŋbek jaǧdaiynda jūmys ısteitınderge zeinetke erte şyǧu mümkındıgı qarastyrylǧanyn atap öttı.
Sapar barysynda deputattar kolledj studentterı öz mamandyqtary boiynşa täjıribelık maşyq qalyptastyratyn oqu şeberhanalarynyŋ jūmysymen tanysty. Mūnda dänekerleu ısı, qūrylys, avtoslesar, tamaq jäne tıgın öndırısı baǧyttary boiynşa bılım berıledı. Kolledjdegı jūmys barysy jaily jas maman Arailym Amankeldı aityp berdı. Ol «Diplommen – auylǧa» baǧdarlamasy aiasynda tuǧan auylyna oralyp, mūǧalım bolyp qyzmet atqaryp jür.
Deputattar sondai-aq medisina qyzmetkerlerıne arnalǧan köppäterlı tūrǧyn üi keşenınıŋ kürdelı jöndeu jūmystaryn tekserdı. Būl üi būǧan deiın bos tūrǧan ǧimarattan qaita jaŋǧyrtylyp jatyr. Jyl soŋyna deiın jaŋa qyzmettık baspanaǧa audandyq auruhananyŋ jas qyzmetkerlerınen 14 otbasy qonystanady dep josparlanuda. Aimaq basşylyǧynyŋ aituynşa, auyldaǧy medisina qyzmetkerlerın qoldauǧa baǧyttalǧan memlekettık qoldau şaralarynyŋ arqasynda bügınde Nūra auylynda bılıktı kadrlar tapşylyǧy mäselesı ıs jüzınde şeşımın tapqan.
Audanda auyl şaruaşylyǧy da qarqyndy damyp keledı. Mäjılıs deputattary biyl ıske qosylǧan «MF Ramadan» JŞS-nıŋ süt fermasynyŋ jūmysymen tanysty. Käsıporyn 1100 golştin-friz tūqymdy sauyn siyr ūstauǧa arnalǧan. Tehnologiialyq tūrǧydan jaŋa sauu jabdyǧynyŋ kömegımen ferma täulıgıne – orta eseppen 27 tonna, jylyna 10 myŋ tonnaǧa deiın süt öndırudı josparlap otyr.
Osakarov audanynda Mäjılıs töraǧasy men deputattarǧa taǧy bır investisiialyq joba – quattylyǧy 150 MVt bolatyn jel elektr stansasynyŋ qūrylysy tanystyryldy. Bügınde mūnda josparlanǧan 21 jel qondyrǧysynyŋ 9-y ıske qosylyp, energiia öndırude. Alynǧan «jasyl» elektr energiiasy qosalqy stansa arqyly jalpy taratu jelısıne jıberıledı. Joba aiasynda auyldan 20 jaŋa jūmys orny aşylǧan.
Delegasiia sondai-aq 2020 jyly tolyq qaita jaŋǧyrtudan ötken «Jastar» balalar men jasöspırımder ortalyǧyna bardy. Qazırgı taŋda ortalyqta zamanaui baǧyttar boiynşa 25 üiırme jūmys ısteidı. Auyldyŋ 600-den astam balasy mūnda IT, robottehnika, jasandy intellekt, muzyka men teatr önerı, qoldanbaly şyǧarmaşylyq, tılder jäne basqa da salalar boiynşa bılım aluda.
Osy jerde Mäjılıs deputattary Osakarov audanynyŋ jūrtşylyǧy ökılderımen kezdestı. Äŋgıme barysynda jergılıktı öndırıstı damytu perspektivalary talqylandy. Atap aitqanda, aldaǧy jyldary öŋırde syiymdylyǧy 2500 tonna bolatyn kökönıs saqtau qoimasy, 6000 bas malǧa eseptelıngen elımızdegı eŋ ırı süt-tauar fermasy, jylyna 45 million kırpış şyǧaratyn kırpış zauytynyŋ qūrylysy, sondai-aq suarmaly jerlerdıŋ aumaǧyn aitarlyqtai keŋeitu ısı josparlanyp otyr.
Erlan Qoşanov ötken sessiiada qabyldanǧan Salyq, Biudjet jäne Su kodeksterı, sondai-aq äleumettık damu baǧytyndaǧy bırqatar zaŋ turaly aitty. Olardyŋ qatarynda «Keleşek» jinaqtau jüiesı turaly zaŋ, daryndylardy qoldau normalary, MÄMS jüiesınde bazalyq medisinalyq kömektı saqtau, onkoskriningtı keŋeitu jäne basqa da maŋyzdy bastamalar bar.
Odan bölek, Erlan Qoşanov audandyq mäslihat deputattaryn zaŋ şyǧaru jūmysyna belsendırek qatysuǧa şaqyrdy. Öz ūsynystaryn Qoǧamdyq palata arqyly engızıp, sondai-aq Mäjılıs saityndaǧy arnauly moduldıŋ mümkındıkterın paidalanuǧa keŋes berdı. Būl jait qabyldanatyn zaŋdardyŋ sapasyn arttyryp, olardyŋ naqty öŋırlık jaǧdailarǧa sai boluyna yqpal etedı.
Azamattardyŋ, käsıpkerlerdıŋ jäne audan basşylyǧynyŋ ötınışterı men ūsynystary Mäjılıs deputattary tarapynan jaŋa parlamenttık sessiia bastalǧan kezde talqylauǧa şyǧarylatyn bolady.
