İzraildıŋ ūlttyq qauıpsızdık ministrı İtamar Ben-Gvir jeksenbı künı İerusalimdegı Äl-Aqsa meşıtıne baryp, ǧibadat ettı, dep habarlaidy «Adyrna» tılşısı BBC-ge sılteme jasap.
Būryn mūsylman bilıgımen jasalǧan beiresmi kelısımge säikes, Äl-Aqsa keşenı İordaniialyq dıni qordyŋ basqaruynda jäne evreiler ol jerge keluge qūqyly. Alaida meşıtte namaz oquǧa tyiym salynǧan.
«Ǧibadathana tauynyŋ äkımşılıgı» dep atalatyn şaǧyn evrei ūiymy jariialaǧan videoda Ben-Gvirdıŋ bır top adammen keşen aumaǧynda seruendep jürgenı körınedı. Basqa videolarda onyŋ namaz oqyp jatqany baiqalady.
Äl-Aqsa meşıtı — mūsylmandar üşın Qaǧba (Haram meşıtı) men Mädinadaǧy paiǧambar meşıtınen keiıngı üşınşı qasiettı oryn, al Ǧibadathana tauy — iudaizmdegı eŋ qasiettı oryn.
İzrail 1967 jylǧy Taiau Şyǧys soǧysy kezınde Äl-Aqsa keşenın İordaniiadan tartyp alǧan. Sol kezde İordaniia būl jerdıŋ tarihi qorǧauşysy retındegı rölın jalǧastyru qūqyǧyn saqtap qalǧan, al İzrail qauıpsızdık pen kıru-şyǧu mäselesın öz baqylauyna alǧan.
Palestinalyqtardyŋ aituynşa, soŋǧy jyldary keşenge kelgen evreiler onda jiı namaz oqidy, al İzrail polisiiasy olarǧa kedergı keltırmeidı.
Aita keteiık, İzrail keşen aumaǧynda mūsylman emesterdıŋ namaz oquyna şekteu qoiatyn erejelerdı moiyndaidy. Ben-Gvirdıŋ saparynan keiın premer-ministr Biniamin Netaniahu İzraildıŋ Äl-Aqsa keşenındegı status-kvony saqtau saiasaty «özgermegenın jäne özgermeitının» mälımdedı.
Ūltşyl közqarastaǧy Ben-Gvir ūlttyq qauıpsızdık ministrı retınde polisiia qyzmetın baqylaidy. Ol būl jerge būǧan deiın de barǧan. Times of Israel basylymynyŋ jazuynşa, būl joly ol alǧaş ret Ǧibadathana tauynda aşyq türde qūlşylyq jasaǧan. Sapar kezınde ony polisiia qyzmetkerlerı alyp jürgen. Öz mälımdemesınde Ben-Gvir İzraildıŋ Gazadaǧy HAMAS-pen soǧysta jeŋıske jetuın jäne sodyrlardyŋ qolynda tūrǧan izraildık tūtqyndardyŋ elge oraluyn tılep, ǧibadat etkenın jetkızdı.
