Prezident Qasym-Jomart Toqaev Aqordada halyqaralyq pän olimpiadalary jeŋımpazdarymen jäne jüldegerlerımen kezdestı.
Is-şaraǧa 24 laureat, atap aitqanda, 4 altyn, 11 kümıs jäne 9 qola medal iegerı şaqyryldy. Oquşylar himiia, matematika, fizika, geografiia, informatika jäne biologiia pänderınen üzdık nätije körsetken.
Prezident jastardy, eŋ aldymen, bılım älemındegı jeŋısterımen qūttyqtap, şynaiy rizaşylyǧyn bıldırdı. Olardyŋ halyqaralyq bedeldı bılım saiystarynda top jaryp, Qazaqstannyŋ atyn älemge paş etuın zor jetıstık retınde baǧalady.
– Jüzden jüirık, myŋnan tūlpar şyǧu, älemdık jarysta jeŋıske jetu oŋai emes. Bılımge degen ūmtylystyŋ, naǧyz eŋbekqorlyq pen tabandy ıs-ärekettıŋ arqasynda osyndai biıkke şyǧyp jatsyzdar. Rasynda, darynǧa ie bolu, būl – baqyt. Bıraq jai ǧana eŋbeksız daryn jetıstıktıŋ kepılı bola almaidy. Darynnyŋ közın aşu kerek jäne ony tolyǧymen paidalana bılu qajet. Är jeŋıs, är medal tynymsyz ızdenıspen, maŋdai termen, üzdıksız daiyndyqpen keledı, – dedı Memleket basşysy.
Prezident şäkırt qabıletın ūştaǧan ūlaǧatty ūstazdar memlekettık marapatqa laiyq ekenın jetkızıp, ozyq oily ūrpaq tärbielegen ata-analarǧa alǧys aitty. Qazaqstannyŋ bolaşaǧy – jasampaz jastardyŋ qolynda ekenıne nazar audaryp, ūl-qyzdarymyz ärdaiym üzdıkter qatarynan tabylatynyn atap öttı.
– Jastarymyz jahandyq sport jäne öner dodalarynda jeŋımpaz atanyp, tuymyzdy kökte jelbıretıp jür. Bılım salasyndaǧy bedelımız de artyp kele jatyr. Byltyrdan berı oquşylarymyz 30-dan astam halyqaralyq olimpiada men ǧylymi jarysqa qatysyp, myŋǧa juyq medal aldy. Onyŋ 200-ge juyǧy – altyn, 300-den astamy – kümıs, al 500-ge juyǧy – qola medal. Būl tamaşa körsetkış Qazaqstandaǧy bılım sapasynyŋ deŋgeiı joǧary ekenın körsetedı. Taǧy da qaitalap aitamyn, bız älemdık jarysta el namysyn qorǧaǧan är jeŋımpazdy maqtan tūtamyz. Sızderdı elımızdıŋ betke ūstar, laiyqty azamattary dep sanaimyn. Bolaşaqta da Qazaqstannyŋ odan ärı damuyna qomaqty üles qosatyndaryŋyzǧa kämıl senemın, – dedı Prezident.
Qasym-Jomart Toqaev jastarǧa barynşa jaǧdai jasau memlekettıŋ basty mındetınıŋ bırı ekenıne toqtaldy. Būl baǧytta auqymdy ıs atqarylyp jatyr. Bıraq negızgı jūmys älı alda.
– Qazırgı taŋda elımızdıŋ är aimaǧynda zamanaui ülgıdegı «Keleşek mektepterı» aşyluda. Mūǧalım märtebesın köteruge basa män berılıp jatyr. Ǧylym jolyna tüsken jastarǧa jan-jaqty qoldau körsetılude. Būl rette «Bolaşaq» halyqaralyq stipendiiasy tiımdı röl atqaruda. Joba aiasynda myŋdaǧan jas azamat älemnıŋ ozyq universitetterı men zertteu ortalyqtarynda bılım aldy. Bügınde olardyŋ köbı elımızdı örkendetuge mol üles qosuda. Aldymyzda tūrǧan mındet – osy stipendiiaǧa naǧyz qabılettı, daryndy balalardy ırıkteu. Kezdeisoq adamdardy qosuǧa bolmaidy. Sondyqtan kelesı jyldan bastap halyqaralyq olimpiada jeŋımpazdaryn «Bolaşaq» baǧdarlamasy boiynşa oquǧa jıberu turaly şeşım qabyldandy. Osylaişa, bız daryndy ärı talapty jastarǧa jan-jaqty qoldau körsete beremız, – dedı Memleket basşysy.
Prezidenttıŋ pıkırınşe, halyqaralyq bedeldı olimpiadalardaǧy jastardyŋ jetıstıkterı ūltymyzdyŋ ziiatkerlık quaty men öskeleŋ ūrpaqtyŋ zor äleuetın tanytady.
– Elımızge ǧalymdar, injenerler, pedagogtar, därıgerler men basqa da joǧary bılıktı mamandar qajet. Äsırese, jasandy intellekt salasyndaǧy mamandar airyqşa sūranysqa ie bolady. İnnovasiia men joǧary tehnologiialar negızınde elımızdıŋ aldaǧy damu kezeŋderınıŋ berık ırgetasyn qalap jatyrmyz. «Rosatom» kompaniiasymen bırge salynatyn alǧaşqy atom elektr stansasy strategiialyq maŋyzǧa ie. Bırer kün būryn onyŋ qūrylysy resmi türde bastaldy. AES energetika nysany ǧana emes, ǧylymi-tehnikalyq progrestıŋ jarqyn simvoly boluǧa tiıs. Äzırge onyŋ atauy joq. Būl elımızdegı tūŋǧyş stansa bolǧandyqtan, halyq arasynda üzdık atau jönınde baiqau jariialauǧa bolady dep sanaimyn. Osy saiysqa qatysyp, şyǧarmaşylyq qarymdaryŋyzdy körsetuge şaqyramyn. Bälkım, şeşım qabyldaǧan kezde Sızderdıŋ de ūsynystaryŋyzǧa süienermız, – dedı Prezident.
Memleket basşysy jastarǧa ǧibratty sözın arnady.
– Bız qazır bärımız bır el bolyp Ädılettı, Taza ärı Qauıpsız Qazaqstandy qūryp jatyrmyz. Būl – jai saiasi nauqan emes. Būl – memlekettılıgımızdı nyǧaitu degen söz. Osy auqymdy jūmysty jastarymyz üşın bastadyq. Endı ony mındettı türde oryndauymyz qajet. Onyŋ bar igılıgın, eŋ aldymen, öskeleŋ ūrpaq, iaǧni, Sızder köresızder! Men elımızdıŋ jastaryna zor senım artamyn. Qazaqstan jastary közı aşyq, kökıregı oiau, oiy ūşqyr, daryndy, eŋbekqor azamattar dep ünemı aityp jüremın. Ūl-qyzdarymyz ärqaşan adal azamat degen atqa sai bolsyn dep tıleimın. Eŋ aldymen Otanǧa, elımızge adal bolyŋyzdar. Sızder halqymyzdy jer jüzıne ziiatker ūlt retınde tanytyp jürsızder. Ärdaiym ızdenıs pen eŋbek jolynda bolyŋyzdar. Öskeleŋ ūrpaq Sızderge – talantty jastarǧa qarap boi tüzeidı, – dedı Qasym-Jomart Toqaev.
Memleket basşysy halyqaralyq jarystarda top jaryp, altyn, kümıs jäne qola medal ielengen jastarǧa 1500, 1000 jäne 500 ailyq eseptık körsetkış mölşerınde qarjylai syiaqy sertifikattaryn saltanatty türde tabystady.
