Resei prezidentı Vladimir Putin men AQŞ prezidentı Donald Tramp arasynda Aliaskada ötken kelıssözderı aiaqtaldy, dep habarlaidy «Adyrna» tılşısı.
2 saǧat 45 minutqa sozylǧan kezdesude taraptar Ukrainadaǧy soǧysty beibıt jolmen retteu mäselesın köterdı.
Kelıssözden keiın memleket basşylary AQŞ-tyŋ Elmendorf–Richardson äue küşterı bazasynda bırlesken baspasöz konferensiiasyn ötkızdı. Jurnalisterden bölek, zalda ekı el delegasiiasynyŋ müşelerı de boldy.
Putin kelıssözdıŋ nätijelı ötkenın atap ötıp, AQŞ-qa alǧysyn bıldırdı.
«Bız – jaqyn körşıler. Kelıssözderımız özara qūrmet, tüsınıstık jäne syilastyqpen öttı. Qajettı ärı paidaly jüzdesu boldy»,—dedı ol.
Sondai-aq Resei prezidentı taǧy da "Beibıt kelısımge qol jetkızu üşın soǧysqa türtkı bolǧan sebepterın joiu qajet" degen sözın qaitalady.
Öz kezegınde Tramp qos taraptyŋ «tolyq tüsınıstıkke jete almaǧanyn, äzırge kelısım jasalmaǧanyn» mälımdedı. Sonymen bırge ol kezdesudı «öte nätijelı» dep atap, Resei men AQŞ-tyŋ Ukrainadaǧy soǧysqa qatysty köptegen tarmaq boiynşa uaǧdalasqanyn jetkızdı. Būdan bölek, Aq üi basşysy jaqyn uaqytta Ukraina prezidentı Vladimir Zelenskii men NATO boiynşa ärıptesterın telefon arqyly kezdesu qorytyndysynan habardar etetının mälımdedı.
Aita keteiık, memleket basşylarynan bölek, kezdesuge Resei tarapynan Syrtqy ıster ministrı Sergei Lavrov pen Putinnıŋ kömekşısı Iýrii Uşakov, al AQŞ tarapynan memlekettık hatşy Marko Rubio men Tramptyŋ arnaiy ökılı Stiv Uitkoff qatysty.
Būl – Reseidıŋ Ukrainaǧa auqymdy basyp kıruınen keiıngı AQŞ pen Resei prezidentterınıŋ alǧaşqy kezdesuı.
