Taşkentte Qazaqstan men Özbekstan jūmys toptarynyŋ kezdesuı öttı, dep habarlaidy "Adyrna" ūlttyq portaly.
Kezdesude ekı eldıŋ atom elektr stansiialaryn saluǧa jauapty ökılderı tötenşe jaǧdailar kezınde jedel äreket etudıŋ bırlesken jüiesın qūru mäselesın qarastyrdy.
Qazaqstandyq delegasiiaǧa ekologiia jäne tabiǧi resurstar vise-ministrı Jomart Äliev jetekşılık ettı. Taraptar radiasiialyq jäne ekologiialyq jaǧdaidy bırlesıp baqylau jüiesın äzırleu qajettıgın atap öttı. Sondai-aq AES qūrylysynda qauıpsızdık basty basymdyq boluy tiıs ekenı bırneşe ret aityldy. Äsırese, seismikalyq qauıp mäselesıne nazar audaryldy.
Özbekstan tarapy iadrolyq jäne radiasiialyq qauıpsızdık salasyndaǧy halyqaralyq qūqyqtyq mındettemelerdı oryndaudaǧy jetıstıkterımen bölısken.
Kezdesude kadr daiarlau baǧytyndaǧy yntymaqtastyq ta talqylandy. Onyŋ ışınde Taşkenttegı Reseidıŋ Ūlttyq iadrolyq zertteu universitetı filialy negızınde bırlesken bılım beru baǧdarlamalaryn qūru ūsynyldy.
«Özatom» basşysy Azim Ahmedhadjaev Qazaqstanda injenerlık-ızdestıru jūmystarynyŋ bastalǧanyna quanyşty ekenın jetkızıp, būl kezeŋnıŋ asa maŋyzdy ekenın atap öttı.
Al Jomart Äliev öz sözınde Özbekstannyŋ täjıribesın eskere otyryp, qaitalanbas qatelıkterden sabaq alu maqsat ekenın atap öttı.
