Şymkent qalasy – elımızde alǧaşqylardyŋ bırı bolyp «Kıtap oqityn ūlt» respublikalyq jobasyna resmi türde qosyldy. Būl turaly qala äkımı Ǧabit Syzdyqbekov mälımdedı.
Memleket basşysy Qasym-Jomart Toqaev Atyrauda ötken Ūlttyq qūryltaidyŋ üşınşı otyrysynda: «Ozyq oily ūlt boludyŋ eŋ töte joly – kıtap oqu» dep atap ötıp, kıtap oqudy damytu mäselesıne erekşe nazar audarǧan bolatyn.
Prezident bastamasyn qoldaǧan Mäjılıs Töraǧasy, «AMANAT» partiiasynyŋ töraǧasy Erlan Qoşanov juyrda respublikalyq deŋgeide «Kıtap oqityn ūlt» pilottyq jobasynyŋ bastalǧanyn resmi türde jariialady. Būl maŋyzdy joba alǧaş bolyp engızıletın öŋırler qatarynda Şymkent qalasy, sondai-aq Qaraǧandy jäne Qostanai oblystary bar.
Şymkent qalasynyŋ äkımı Ǧabit Syzdyqbekov atalǧan bastamaǧa qoldau bıldıre otyryp, tūrǧyndardy belsendı qatysuǧa şaqyrdy:
«Şymkent – tek respublikalyq maŋyzy bar megapolis qana emes, ol – tarihy tereŋ, mädenietı bai, bılım salasynyŋ dästürı qalyptasqan şahar. Sondyqtan däl osyndai maŋyzy zor jobanyŋ bızdıŋ qalada jüzege asuy – zaŋdylyq. Kıtap – bılım men şabyttyŋ sarqylmas qainary. Ol kökjiegıŋdı keŋeitedı, tūlǧaŋdy qalyptastyrady, jaŋa mümkındıkterge jol aşady. Ärqaisyŋyzdy osy igı bastamany qoldap, belsendı qatysuǧa şaqyramyn», – dedı qala basşysy.
Jobanyŋ maqsaty – kıtap oqu mädenietın qalyptastyru jäne därıpteu.
Pilottyq joba aiasynda qala tūrǧyndary kelesı nominasiialar boiynşa baiqauǧa qatysa alady:
• «Kıtap oqityn mektep»
• «Kıtap oqityn kolledj»
• «Kıtap oqityn universitet»
• «Kıtap oqityn pedagog»
• «Kıtap oqityn äulet»
• «Kıtap oqityn memlekettık qyzmetker»
Qatysuşylarǧa qoiylatyn ortaq talap – joba barysynda kemınde 15 kıtap oqyp, öz sanaty boiynşa baiqauǧa qatysu. Jeŋımpazdar arnaiy komissiia şeşımımen anyqtalyp, qūrmet gramotalary jäne baǧaly syilyqtarmen marapattalady.
Jobany kım jüzege asyrady?
Jobany «AMANAT» partiiasy «Kıtap oqityn ūlt – Chitaiuşaia nasiia» qoǧamdyq qorymen bırlesıp jüzege asyruda. Bas demeuşı – ALAGEUM ELECTRIC kompaniiasy.
Jobanyŋ maŋyzdylyǧy nede?
«Kıtap oqityn ūlt» – būl bır rettık aksiia emes, ūlttyŋ mädeni deŋgeiı men oilau örısın arttyruǧa baǧyttalǧan ūzaqmerzımdı jobalardyŋ bırı. Jastardyŋ intellektualdyq äleuetın köterıp, kıtap oqu arqyly adam kapitalyn damytu – jobanyŋ basty maqsaty.
Joba arqyly tek oquşylar men studentter ǧana emes, pedagogter men memlekettık qyzmetşıler, tūtas otbasylar da qamtylady. Būl – qoǧamnyŋ ärbır müşesın kıtappen bailanystyruǧa arnalǧan keşendı qadam.
