Astanada Hyundai avtokölıgınıŋ jürgızuşısı jaiau jürgınşıler köpırıne kırıp ketkenı üşın 10 täulıkke äkımşılık qamauǧa alyndy. Būl turaly qala äkımdıgı mälımdedı, dep habarlaidy “Adyrna”.
Oqiǧa 1 qyrküiek künı bolǧan. Hyundai Accent kölıgın tızgındegen jürgızuşı Atyrau köpırıne kırıp, jol jüru erejelerın būzyp, ainalasyndaǧylarǧa qūrmetsızdık tanytqan.
“Polisiia QR Äkımşılık qūqyqbūzuşylyqtar turaly kodekstıŋ 434 jäne 437-baptary boiynşa ıs materialdaryn jinaǧan. Arnaiy mamandandyrylǧan audanaralyq äkımşılık sot būl jas jıgıtke 10 täulık äkımşılık qamau jazasyn taǧaiyndady”, delıngen habarlamada.
Polisiia departamentı mūndai äreketterdıŋ qauıpsızdıkke qater töndırıp, qoǧamdyq tärtıptı būzatynyn atap öttı. Jyl basynan berı elordada ūsaq būzaqylyq pen vandalizm üşın jüzden astam adam jauapqa tartylǧan.
